Segun parlamentario independiente Daphne Lejuez, candidato number 2 riba lista di partido Accion21, proteccion di nos medio ambiente, flora y fauna ta laga hopi di desea riba nos pais. E ta express cu na e momentonan aki no tin un ley di medio ambiente (milieuwet) pa por garantisa un desaroyo den balans cu nos medio ambiente y bienestar general di nos cuidadanonan, anto a yega ora pa tuma accion riba esaki.

Introduci y implementa Milieuwet

“Pa por crea un isla dushi pa biba pa nos cuidadanonan, nan yiunan y nan nietonan mester percura pa introduci y finalisa un ley marco di medio ambiente di Aruba, pa asina por frena desaroyo descontrola”, segun Daphne Lejuez. Di e forma aki, e parlamentario ta bisa cu lo por regula y crea e condicionan necesario pa por realmente tin desaroyo responsabel, sostenibel, y duradero. E ley aki lo ta un punto di atencion urgente, mirando cu Aruba ta un di e paisnan mas popula den region, y e uso di espacio mester wordo bon regula. Tambe, e ley lo inclui sanccionan pa infraccionan cu keda haci. A base di e Milieuwet, lo mester actualisa nos hinderverordening pa por cumpli cu e rekisitonan di esaki.

Introduci y Implementa Parke Marino

Ta sumamente importante segun sra. Lejuez pa revisa como tambe implementa e ley di Parke Marino pa asina por proteha bida maritimo manera entre otro nos coralnan, rifnan, mangroves, pisca, turtuga y tur otro. Financiamento sostenibel por wordo genera por medio di por ehempel Blue Finance, Carbon Credit Off-set, fondonan Europeo, pero tambe tur esnan cu ta haci uso turistico di e zonanan aki (divers marine tag).

Mehora e calidad di nos aire

Un punto di enfoke tambe di sr. Lejuez ta pa stimula mas plantacion di mata local cu ta duna sombra, por ehempel den cuidad y barionan. “E matanan lo duna mas cu sombra”, sra. Lejuez ta agrega, “ya cu nan lo percura pa un miho calidad di aire como resultado.” Ta esencial pa introduci tambe regulacion pa por midi polucion den aire di projectonan cu tin emision directo den aire liber pa asina percura cu nan ta atende na standard reconoci mundialmente.

Teniendo esakinan na cuenta, sra. Lejuez ta conclui cu lo por regula y crea e condicionnan necesario pa por realmente tin desaroyo responsabel, sostenibel y duradero, y lo por crea un isla dushi y sano pa biba pa nos ciudadanonan, nan yuinan y nan nietonan.

LEAVE A REPLY

Please enter your comment!
Please enter your name here