DEA a presenta PEN 2030 na stakeholdernan

ORANJESTAD – Diabierna dia 12 di april, Departamento di Enseñansa Aruba tabatin e honor pa presenta e Plan Educacion Nacional (PEN) 2030 na stakeholdernan di sector social, economico y di medio ambiente.

Na final di aña 2017, Minister di Enseñansa sr. dr. A.R. Lampe a encarga Departamento di Enseñansa Aruba (DEA) cu e Plan Educacion Nacional: PEN 2030. Meta di e Nationaal Onderwijsplan ‘PEN 2030’ ta pa hunto cu tur stakeholder, yega na un vision comun pa Educacion na Aruba.

Durante e atardi aki, sra. Sheila Maduro, Hoofd Onderwijskundige Zaken di Departamento di Enseñansa Aruba, a elabora tocante e proceso pa yega na e plan. E proceso aki a encera consultanan cu diferente stakeholdernan, pa asina nan por a duna nan contribucion na e vision nobo pa Educacion na Aruba.

Tambe a organisa actividadnan pa intercambia pensamentonan tocante calidad, innovacion y ‘best practices’ den Enseñansa.

Como punto di salida, a uza e General Education Quality Analysis Diagnosis Framework (GEQAF), di UNESCO. Tambe a uza un analisis SWOT di e Nationaal Onderwijs Plan 2007-2017 y Enseñansa. Pa duna docentenan e oportunidad di vocifera nan opinion, a tene un encuesta digital. Na mes un manera comunidad tambe a contribui na yega na e vision di PEN 2030. Expertanalyses a wordo teni na diferente ocasion unda directivanan di scol, Inspectoria di Enseñansa hunto cu Departamento di Enseñansa a evalua e situacion actual di Educacion y e rumbo cu nos kier tuma como pais. Durante e ronda di consulta pa cabesantenan di tur scol na Aruba, na nan turno a haya e oportunidad di vocifera nan puntonan di atencion pa Educacion y e elementonan cu nan lo kier den e vision pa Educacion 2030.

Educacion ta concerni nos tur, y p’esey ta asina importante pa traha hunto cu stakeholdernan pafo di Educacion pa asina nos conhuntamente logra e metanan. E sectornan pafo di Educacion a duna nan perspectiva riba e rumbo cu nos pais mester tuma, pa asina acopla cu desaroyonan nacional y internacional.

Durante e presentacion aki, Maduro a trece varios topico dilanti, e.o. desaroyo di Enseñansa mundial y na Aruba, habilidad necesario, puntonan di atencion pa enseñansa y vision di Educacion 2030.

Ademas a toca e tema di e cuadro di calidad, cu ta encera meta di desaroyo, resultadonan desea, procesonan primario, fuentenan nucleo y mecanismo di sosten.Maduro a amplia tocante e resultadonan cu a bin di tur e actividadnan. Kico ta e puntonan di bista cu a bin dilanti di parti di e stakeholdernan interno y externo, y e buraco cu tin, y con pa yena esaki.

Tambe a papia tocante e mision, balornan, vision nobo, metanan strategico, puntonan clave di cada meta strategico, y con lo bay di plan pa accion. Ademas a elabora tocante e situacion di Enseñansa actual y e situacion desea y con pa yega na esaki.

 

You May Also Like

image.jpeg

Varios herido den accidente fuerte na Siribana

Diamars pasa di 7:30 anochi riba e caminda di Siribana na Santa Cruz caminda ...

Shutdown na Merca afectando biaheronan local

ORANJESTAD – Recientemente e gobierno di Merca a anuncia cu nan tin un ‘Govermente ...

Aruba bon representa durante conferencia ‘Islands In Between’

Recientemente e linguista y Papiamentista, Ramon Todd Dandaré a asisti na e di 20 ...

Simposio ta cuminsa cu analisis di corupcion den Reino

Ayera anochi a tuma luga e prome anochi di e simposio organisa conhuntamente pa ...

julia renfro 2.jpg

“Tur hende sa Florida ta make of break Merca

Awe Merca su pueblo lo eligi un presidente nobo cu lo administra e destino ...

No ta tur hende por haya un luga na SABA mas manera antes

“No ta manera antes mas cu nos ta bira grandi, nos ta registra na ...