Segun presidente di KWF, Lilly Prince: Na 2018 entrada di KWF a aumenta cu 33.17% y gastonan a baha cu 2%

ORANJESTAD – Cu palabra di gradicimento, presidente di Koningin Wilhelmina Kanker Fonds Aruba (KWF), Lilly Prince a anuncia cu durante 2018 e fundacion aki a logra recauda un tiki mas compara cu e aña anterior.

Entrada
El a presenta un relato di nan cuenta anual di 2018, caminda financieramente nan entrada a presenta un aumento di 33.17% compara cu 2017. E entrada total cu e fundacion aki a haya aña pasa tabata di 520.533,46 florin. E aumento aki ta atribui solamente na e evento Crossing For Hope, cu tabata e cinco landado kende el a yama como ‘heroenan’, cu a landa for di Venezuela pa Aruba dia 11 di november ultimo. E cuenta pa recauda fondo pa e evento exitoso aki a keda habri te dia 31 di maart ultimo, y el a produci 130.626, 67 florin den caha di KWF.

Tambe el a confirma cu e rifa anual y e luna di accion di recaudacion di april 2018 a bay bon. Aña pasa nan a yega di colecta riba caya un suma di 78.716,75 florin. E rifa a trece aden 127.500 florin. E donacion cu e companianan grandi a yega di haci a yega te cu 85.136 florin. Tambe nan ta haya donacion di otro instancianan, manera banco cu ta organisa un torneo di golf pa yuda cu e gastonan cu KWF tin pa atende cu nan clientenan victima di cancer.

E bunita cifranan aki tabata posibel danki na tur contribuyente y pueblo en general cu a sostene KWF. P’esey aña pasa KWF tabatin un atardi di gradicimento, pa asina duna e gratitud na cada comerciante, y cada persona individual aki na Aruba. “Si nan nos no lo por!,” el a declara na e matutino aki. E sosten financiero aki ta duna e fundacion KWF e forsa pa cumpli cu nan gastonan.

Gastonan di KWF
Na 2018, e gastonan a keda casi mesun cos cu 2017. Entrada a yega na 520.533,46 florin y e gastonan total a yega na 347.640,22 florin. E cifra aki ta 2% menos cu 2017. E gasto mas grandi tin di haber cu cuido na cas di e pashentnan victima di cancer, cu ta un 40% di e gasto total.

Ademas e gastonan di protesis ta casi 16% di e gastonan total. Pa loke ta e proyectonan di prevencion, ayudo di transporte pa pashentnan y otro sorto di ayudo manera peluca, ta un 17% di e gastonan di KWF. Tambe nan tin gastonan cu e mantencion di e edificio y pago di servicionan di utilidad. E proyecto di colecta fondo tambe tin su gastonan aden. Ya cu e accion aki ta demanda full un preparacion y logistica cune . El a laga sa cu como boluntario, niun di nan ta cobra niun cen pa nan trabou na servicio di nos comunidad.

“Nos ta akinan pa duna nos aporte, amor y cariño cu bo tin cu duna pa e trabou aki continua,” el a bisa.

Tur luna di april, KWF ta bin cu nan campaña di colecta riba caya. Nan a cuminsa dia 6 di april nan prome colecta, y diasabra ultimo 13 di april nan a tene e di dos colecta. E siman aki di Siman Santo, nan ta abstene di colecta; y tambe dia 27 di april Aña di Rey, nan no ta colecta. Pero pa luna di mei, KWF su boluntarionan ta bay colecta tur diasabra . “Nos mester atrobe e fondo pa nos por sigui traha,” segun presidente di e fundacion.

E aña aki nan a realisa e accion for di 10or di mainta te 5or di atardi. Ya cu nan tin hopi precaucion cu mester tene cuenta cune; ya cu e boluntarionan ta hobencitonan di scol. Pues e tempo cu nan tabata sali cu e muchanan 8or di mainta te 7or anochi a cambia.

“Aworaki nos tin cu percura di cuida tur persona cu ta yudando nos, pasobra nos ta colectando pa haci nos trabou den comunidad,” el a declara na Bon Dia Aruba.

 

 

 

You May Also Like

eleccion 2.jpg

Trump riba 264 voto electoral: presidente nobo di Merca

NEW YORK –  Donald Trump ta ganando e eleccion cu 264 voto electoral (48.2%) ...

Ainda no a yega na paso legal riba retiro di director di Utilities N.V.

ORANJESTAD – Abogado Hans Sjiem Fat, kende ta representa director di Utilities Aruba N.V., ...

Prome castigo TBS na Aruba pa padrastro kende a mata Rishandroh y Eugene

15 aña di prizon incondicional y tratamento di TBS sin un duracion defeni pa ...

Ministernan ta priminti ciclista area na Colony pa train

Ayera ciclistanan a bin hunto pa protesta pa di dos biaha e aña aki ...

Caso Ibis den corte na mei

Un cantidad di persona lo wordo hiba dilanti corte dianan 23, 24 y 25 ...