Declaracionnan unico di Paul Croes durante inicio caso Ibis

ORANJESTAD – Ayera mainta a tuma luga caso Ibis dilanti corte di prome instancia. E ex mandatario Paul Croes a para pa tres ora durante di e tratamento di e caso. Durante di e tratamento di e caso e ex mandatario Paul Croes a keda insisti cu e ta inocente di tur e acusacionnan den e caso Ibis. Croes a bisa cu ta Ministerio Publico ta interpreta e informacion acumula robes y ta uza esaki na nan fabor.

E ex mandatario Croes ta e sospechoso principal di e caso aki, y aki ta unda cu Ministerio Publico tin cu comproba cu Croes ta culpabel di corupcion, labamento di placa y malversacion. Den e caso aki tin un total di 23 sospechoso. Ministerio Publico a investiga 400 compania den e caso aki.

Caso
Despues di 2 aña y 6 luna cu Ministerio Publico a inicia un investigacion contra ex Minister Paul Croes, ayera a trata e caso den corte. E caso a wordo trata den presencia di 5 otro sospechoso y nan abogado.

Durante di e caso e sospechoso principal, cu ta Paul Croes y su casa Melony Paesch tabata esunnan cu hues y Ministerio Publico a atende. Fiscal Gerritsen a mustra cu ta ora cu dos persona a haci denuncia, cu e investigacion gigantesco por a tuma luga, mientras tabatin hopi indicacion di cosnan robes riba rednan social. Un investigacion ‘scondi’ durante casi un aña, unda cu a tap telefon, persigui e famia y haci varios entrada hudicial, pa asina acumula informacion necesario. Croes a haya e oportunidad pa hiba palabra, y esaki a resulta den un intercambio di palabra di por lo menos 3 ora entre hues, fiscal y Croes, unda cu tanto hues como fiscal a interoga Croes y su casa riba varios di e puntonan specifico.

Declaracion
Croes su declaracion tabata con el a experencia e situacion cu el a haya su mes aden. Loke a resalta e biaha aki, ta cu tanto Croes como su casa, ta bou tratamento psicologico, y cu e biaha aki nan tur dos a papia abiertamente riba nan caso compara cu anteriormente.

Anteriormente nan no tabatin confiansa den Ministerio Publico y tanto Croes como su casa a haci algun declaracion cu nunca antes nan no a haci, cu a pone Fiscal cuestiona esaki. Nan responde Fiscal “Nos no ta confia boso, p’esey”. “Nos no tabatin confiansa den e proceso. Nos tin confiansa den bo persona”, Croes a bisa e hues dado momento. Durante e curso di e caso, tabata notabel e cambio di tono y apariencia di Croes, cu tabata teriblemente indigna cu e forma di procede di Ministerio Publico.

Ontheffing
Croes a splica e.o. e proceso di ontheffing y con e ta splica tur e acusacionnan cu tin den su contra. “Con bo ta haya e imagen cu Ministerio Publico tin di bo”? Hues a puntra Croes dado momento.

Croes den su splicacion a mustra cu semper el a actua conforme su consenshi y a purba di haci lo mas corecto, pa medio di su fundacion ‘Leadership In Excellence’, pero awor ta resulta cu esaki a bira su ‘downfall’. El a splica di e cultura politico na Aruba, su diferencia cu Hulanda y con e ta funciona pa cu su funcionamento como minister. Y a purba di duna un splicacion riba e donacionnan cu el a ricibi, sea ta pa e fundacion como compra di carchi pa concierto organisa, sumanan di campaña y te hasta cahanan di cerbes cu el a solicita, pero cu nunca el a ricibi.

Tur esaki awor ta den contra di Croes, unda cu e ta wordo culpa di labamento di placa, comete soborno, y mas. Hues dado momento a mustr’e cu hopi biaha e lo tabata actua den cosnan cu e no mester a actua, y cu facilmente hende por compronde cu su accionnan, aunke cu bon intencion, por conduci of crea e duda y speculacion pa cu actonan coruptivo. “Bo mester a djis laga hende haci nan trabou” e hues a bisa. Segun e hues, Croes tabata mete mucho hopi personalmente, unda cu por sali na cla cu e tabata instrui of obstaculisa cierto procesonan di cana camindanan normal. “Bo ta compronde cu hendenan kier of ta sinti cu nan tin cu coopera cu bo, a cambio di fabor, of simplemente pa ‘keda bon cu minister?” hues a bisa.

Hues despues, uzando casonan specifico, a para cerca cada uno y a cuestiona Croes riba nan. Hues a uza e caso di e ex restaurant 297 pa proba su punto. Aki Croes a splica cu el a duna orden berdad cu ora cu e ta come na un cierto restaurant, incluyendo 297, cu e no kier pa tin razzia, pa hende no kere cu e ta esun responsabel pa e accion of razzia.

Croes mester a contesta hues con el a actua cu e fondonan adkiri pa medio di e fundacion di dje den caso di culpabilidad di malversacion. Croes a admiti di a uza fondonan di e fundacion pa cosnan personal, pa e.o. paga pa cancela debe di su estudio, y tambe compra di airco, cancela su credit cardnan personal, pero cu tabata pasobra e tabata uza esaki pa asuntonan politico.

Na dado momento, Croes mester a splica e sumanan grandi cu e tabata saca pa haci algun compras. Aki ta unda cu Croes a bolbe referi na e hecho cu e tabata haci esaki pa asuntonan politico. A cuestiona e hecho cu Croes no a haci mencion di un herencia cu el a haya y aki Ministerio Publico a cuestiona Croes pakico ainda no a duna cuenta di esaki. Hues y fiscal lo trata e caso di e otro sospechosonan y pa diabierna lo presenta su demanda. Croes y e otro sospechosonan lo presenta nan defensa dialuna proximo. E caso mes lo tuma luga dia 31 di januari proximo. Esaki ta segun e fuente NoticiaCla.

You May Also Like

aruba little league.jpg

Aruba ta gana Puerto Rico den Caribbean Regional Tournament World Series

“Mane David a bati Goliath.” Esaki ta entre otro e comentarionan riba e victoria ...

Minister di Husticia na parlamento pa responsabilisa su mes

E cantidad di atraconan den e ultimo simannan atrobe a bira un discusion politico ...

Bursalen a biaha ayera pa Hulanda

Ayera mainta e studiantenan conoci den boca di pueblo manera ‘bursalen’, a presenta na ...

herman hek

Herman Hek a huramenta como griffier nobo di Staten

Drs. mr. Herman Hek, a huramenta como e griffier nobo pa Parlamento di Aruba ...

Stichting Rancho y Arutram a firma acuerdo

Recientemente director di Arutram Teo Croes y presidente di  Stichting Rancho, Clifford Rosa a ...

editorial

Contracto di corto duracion ta haci tanto diferencia?

Den practica semper sa evadi e reglanan! E actual polemica cu a surgi entre ...