ORANJESTAD – Conhuntamente cu representante di SMAC, Musica, San Nicolas Business Association, DOW y contratista, minister Otmar Oduber encarga cu Infrastructura a anuncia e proyectonan tumando luga na Carnival Village.

Ya pa 5 luna caba DOW ta den ehecucion di diferente trabou cu ta encera e proyecto di Carnival Village pa logra finalisa cu e prome fase, prome cu e festival di Caiso & Soca cu lo tuma luga na e sitio. Conhuntamente cu Minister di Cultura, ta invita henter comunidad di Aruba, specialmente musiconan y nan famia pa asisti e dedicacion aki combinando pasado cu presente. Dunando honor na un di e actividadnan cultural di mas grandi na Aruba.

Oduber a splica cu gobierno a percura pa pone mas cu poco mas cu 1 miyon florin disponibel for di aña pasa pa e proyecto. E proyecto ta reparti den diferente fase cu ta encera un stage multi- funcional unda cu SMAC y Musica lo tin oficina cu espacio pa opera manera cu tabata e intencion inicial cu Carnival Village. Cu e desaroyonan aki no lo uza Carnival Village solamente algun biaha pa aña cu mayoria bes ta den temporada di Carnaval, sino cu e por ta activo henter aña.

‘Actualmente ta trahando riba dos proyecto grandi cual un di nan ta e ‘cara’ di Carnival Village cual ta trata di homenahe na personanan/ figuranan grandi di Calypso y Roadmarch di pasado. Pronto lo anuncia mas di esaki conhuntamente cu minister di cultura, Xiomara Ruiz – Maduro. E meta ta pa e contratista entrega e fase aki pa dia prome di februari.’

Despues di e periodo di carnaval lo traha riba dos otro fase cualnan ta construccion di 6 kiosko (tres cada banda). E kioskonan aki tambe lo por sirbi comunidad henter aña y lo por huur esaki via Directie Infrastructuur en Planning (DIP), mescos cu ta tuma luga na linear park na playa. Lo crea facilidad di baño tambe pa por duna e servicio aki tambe henter aña. E desaroyonan aki ta significa cu lo no mester di tent mas pasobra lo tin kiosko y lo tin baño den Carnival Village mes. E trabounan aki ta planifica pa termina final di juni pa despues cuminsa cu planificacion di e stage y oficinanan, Oduber a splica.
Pa conclui, ta gradici Gabinete Wever-Croes, DOW y tur trahando riba e proyecto pa por logra realisa esaki den e forma mas rendabel cu ta posibel.