Na 2019 Defensor di Pueblo Nacional lo bay haci hopi mas investigacion di e funcionamento di gobierno na Boneiro, Saba y Sint Eustatius. Entre otro di polis, servicio di imigracion y pobresa.
E investigacion di pobresa na e islanan ta remarcabel, pasobra ya tin diferente rapport di entre otro Unicef, Regioned y Nibud. No obstante tur e rapportnan aki gabinete no ta logra pa stipula e asina yama minimo social pa Boneiru, Saba y Sint Eustatius.
Segun defensor di pueblo Reinier van Zutphen su investigacion lo trece ‘solucionnan’ pa Den Haag, pa por ‘saca famia y yiu for di pobresa’. Solucion practico segun Van Zutphen tin mas prioridad cu stipula un suma cu un hende mester minimalmente pa biba di dje.
“Mi ke sa si tin prevision na e islanan manera nos conoce na Hulanda y si ta yuda hende sali for di nan debenan”, Van Zutphen ta bisa. Tambe lo mira cerca Servicio di Impuesto si ta tene suficiente cuenta cu hende cu debe. Esaki ta segun e fuente Retkaribense.
Enfoca riba polis
Lo investiga otro instancia di gobierno tambe. Asina lo bini un investigacion tambe di polis na Boneiro, Saba y Sint Eustatius. Van Zutphen ke sa si polis ‘ta basta sensitivo’ pa keho di ciudadano. “Tin un cantidad di problema na e islanan manera violencia den cas, cu mester trata.”
Tocante Imigracion y Naturalisacion (IND) lo sali un rapport di investigacion na cuminsamento di 2019.
‘Tin be mi ta sinti mi un Boneriano’
Si ta trata di trato di keho, Van Zutphen tin hopi speransa tocante e actitud di e ambtenaar local. “Specialmente na e entidadnan publico mi tabata haya cu por a cambia algo na e servicio, e amabilidad contra e ciudadano y e rapidez. Tin biaha mi mes ta sinti mi Boneriano, pasobra mi tampoco no ta haya contesta,pero poco poco mi ta mira cu esaki ta cambia.”
Awor ta falta ‘e hefenan’ (e miembronan di conseho insular, e mandatarionan y e ambtenaarnan halto), Van Zutphen ta haya. P’esey otro aña Van Zutphen lo tene un training special sperando cu ‘esunnan cu ta na mando’ lo bay percura pa trata keho miho.
Mas placa pa keho y investigacion
Contrai na e gabinete anterior na Hulanda, Defensor di Pueblo y Defensor di Mucha di e gabinete Rutte III actual a haya mas placa pa e ‘munisipionan’ Caribense. Asina por tene mas consulta y haci mas investigacion di keho cu habitante tin tocante e funcionamento di instancianan di gobierno.
Bou di e gabinete anterior cu minister Ronald Plasterk (Asuntonan Interior y Relashonnan den Reino) e plaga extra ey no a bini. “E ora ey mi a bisa: realmente mi mester di mas placa pa por haci mi trabou na e islanan drechi. E tempo ey mi no a hay’e.”
