FILE - In this Sunday, April 11, 2021 file photo, Britain's Prince Andrew speaks during a television interview at the Royal Chapel of All Saints at Royal Lodge, Windsor. U.S. District Judge Lewis A. Kaplan gave the green light Wednesday, Jan. 12, 2022 to a lawsuit against Prince Andrew by Virginia Giuffre, who says he sexually abused her when she was 17. (Steve Parsons/Pool Photo via AP, file)

(AP) — Un hues, pa awo, a nenga di rechasa un demanda contra prins Britanico, Andrew, di un muhe Mericano kende ta bisa cu e prins a abusa sexualmente di dje tempo cu e tabatin 17 aña di edad.

Insistiendo ayera cu e no tabata dunando un veredicto riba e veracidad di e acusacionnan, hues di districto Mericano, Lewis A. Kaplan a rechasa un argumento di abogadonan di Andrew, cu mester rechasa demanda di Virginia Giuffre na un etapa inicial pa motibo di un resolucion legal bieu cu e tabatin cu Jeffrey Epstein, e financiero kende e ta acusa di a regla encuentronan sexual cu e prins.

Kaplan a bisa cu e acuerdo di resolucion di $500mil entre Epstein y Giuffre no tabata involucra e prins y no ta prohibi un demanda contra dje awor. Giuffre a demanda Andrew, di 61 aña di edad, na augustus, bisando cu el a fors’e den encuentronan sexual cune na 2001 door di Epstein y su pareha di hopi tempo, Ghislaine Maxwell.

Giuffre a bisa cu el a wordo abusa sexualmente pa Andrew na cas di Maxwell na London, na mansion di Epstein na New York, y na su propiedad den US Virgin Islands.

Abogadonan di Andrew a bisa cu e demanda no ta suficiente specifico y ta descualifica door di e acuerdo cu el a cera na 2009 cu abogadonan di Epstein. Tambe nan a ataca credibilidad di Giuffre y su motivacion, bisando na october cu e demanda tabatin meta pa logra ‘otro dia di pago riba su custia y riba custia di esnan mas cercano na [Andrew]’.

Kaplan a bisa cu keho di Giuffre no ta ni ‘incvomprendible’ ni ‘vago’ ni ‘ambiguo’. “E ta alega incidentenan discreto di abuso sexual den circunstancianan particular na tres sitio identificable. E ta identifica na ken ta atribui e abuso sexual ey”, el a skirbi.

E hues a inclui den su veredicto hechonan alega pa Giuffre, incluyendo cu Epstein y Maxwell tabata invitado na e fiesta di 40 cumpleaños di e prins na 2006, un luna despues cu fiscalnan den estado di Florida a acusa Epstein di procura un menor di edad pa prostitucion.

Abogadonan di e prins a bisa cu Andrew nunca a abusa sexualmente ni a ataca Giuffre y cu ‘inequivocamente ta rechasa e acusacionnan falso di Giuffre den su contra’.

E prins mes fuertemente a rechasa acusacionnan di Giuffre. Na fin di 2019, prins Andrew a bisa BBC Newsnight cu sex cu Giuffre ‘no a sucede’ y cu e ‘no tin recuerdo’ di a yega di conoc’e. Su declaracionnan a pone criticonan bisa cu e tabata parce insensible pa cu victimanan di Epstein. Despues, e prins a retira di su debernan real.

Abogadonan di Andrew no a responde inmediatamente na mensahenan solicitando comentario ayera. Palacio di Buckingham a bisa AP cu no lo duna comentario riba e ‘asunto legal andando’.

Sigrid McCawley, un abogado pa Giuffre, a bisa den un declaracion cu veredicto di Kaplan ta ‘otro stap importante den e buskeda heroico y determina di Virginia como un sobreviviente di traficacion sexual’.

Mientras Andrew ta rechasa e acusacionnan, Palacio di Buckingham lo kier pa e resolve e caso pa asina Reina Elizabeth II por continua sin mas titularnan teribel cu ta debilita e monarkia y ta susha tur miembro di famia real, segun Mark Stephens, un specialista den ley internacional na Howard Kennedy na London.

Stephens a bisa cu e veredicto di ayera ta nifica cu e proceso di retrasa cada punto tecnico habri na nan como un asunto di ley efectivamente a termina. Maske Andrew probablemente ta bay apela, e caso awo ta bay dilanti y e ta bay enfrenta e berguensa di mester testigua tocante su supuesto actividadnan cu un mucha di 17 aña di edad.

“E realidadnan practico di su posicion a pone un cabuya rond di nek di prins Andrew”, Stephens a bisa. “E mester resolve [e demanda]. E mester sali. Of e ta un homber morto canando.”

Kaplan a nota cu e ta rekeri pa ley, na e etapa aki di litigacion, pa asumi cu acusacionnan di Giuffre ta berdad, maske abogadonan di e prins por pone duda riba e veracidad di e acusacionnan den e huicio. E hues a bisa cu un huicio no ta bay tuma lugar sino hasta mas laat e aña aki, lo mas trempan. Interogacionnan di e prins y Giuffre lo tuma lugar prome cu esey.

Resolucion di Giuffre cu Epstein a keda alcansa un decada prome cu e financiero di 66 aña di edad a comete suicidio na un prison federal na Manhattan mientras e tabata warda un huicio pa traficacion sexual na 2019, mas cu un decada despues cu fiscalnan federal na Florida a yega na un acuerdo cu su abogadonan pa no cer’e. Su abogadonan a bisa cu e acuerdo na Florida ta preveni e acusacion na New York.

Similarmente, abogadonan di Andrew a cita lenguahe den e acuerdo recien revela di $500mil di Epstein pa Giuffre cu ta bisa cu su acusacionnan contra ‘potencial acusadonan’ tampoco ta permiti pa e acuerdo.

Pero Kaplan a skirbi cu tin indicacion substancial den e resolucion cu epstein y Giuffre no tabatin intencion claro pa ‘directamente’, ‘principalmente’ of ‘substancialmente’ beneficia un persona manera e prins. El a nota cu e prins no tabata partido di e acuerdo. Kaplanm tambe a bisa cu e acuerdo tabata ‘leu di un modelo di escritura claro y preciso’.

E hallazgonan di e hues ta imita comentarionan cu el a haci durante argumentonan oral di ambos banda tempo cu e tabata particularmente dismisivo di e argumentonan haci den nomber di e prins.

E acuerdo di Epstein a yega mas cu dos aña prome cu su ex-pareha, Maxwell, di 60 aña di edad, a keda condena pa traficacion sexual y cargonan di conspiracion na un corte federal na Manhattan.

Acusacionnan di Giuffre contra Andrew no tabata parti di e casonan criminal contra Epstein ni Maxwell. Giuffre ta sigura cu el a conoce Andew mientras e tabata biaha frecuentemente cu Epstein entre 2000 y 2002, tempo cu su abogadonan ta insisti e tabata ‘on call pa Epstein pa propositonan sexual’ y tabata ‘fi’e na hombernan poderoso’, incluyendo Andrew. Su demanda ta bisa cu ainda e ta sufri stress y daño psicologico y emocional.

LEAVE A REPLY

Please enter your comment!
Please enter your name here