Aña parlamentario a habri cu bastante tema cayente, y cu ta priminti di continua den e proximo siman y lunanan. Den e varios polemicanan aki no ta asina facil pa distingui berdad for di ficcion, pero nos lo mester haci e intento.

Un prome conflicto a termina por lo pronto cu renuncia di director di Refineria di Aruba NV, cu lo a bay pasobra no tabatin un ambiente mas di aprecio pa loke e por y tabata desea di aporta. Esey ta zona bon, pero di otro banda nos Prome Minister no a tarda cu un reaccion, bisando cu falta di confiansa den e director, entre otro pa informa e mandatario eroneamente, lo tabata e comienso di final di e relacion. Den su argumentonan e mandatario a trece dilanti cu a puntra e director tocante e contract fabuloso cu e compania a cera cu e parlamentario di e partido actualmente den oposicion, cu un ‘areglo di despedida’ asina bondadoso cu di berdad hamas nos a yega di mira algo similar, e director lo a bisa cu e no tabata sa di e asunto. Loke a straña nos como prensa, pasobra tabatin copia di e contract ta circula, cu su firma como director presente na e asamblea general di accionista unda tal decision a ser tuma. Ademas, ni cu e no tabat’ey, anto sigur su reemplazante den e asamblea lo mester a pon’e na altura di e convenio aki, cu ta algo singular cu lo mester a yega na su conocemento. O nos mester kere cu e tabata cana den e lugar wowo cera? Si esey ta e caso anto lo mester a dun’e su retiro pa inepto.

Naturalmente cu di inmediato nos por tuma nota di e escritonan di banda di oposicion, cu ta cuminsa critica cu proximamente, y den cierto caso ya nan lo ta den proceso, di probecha pa reparti e botin cu a keda atras awor cu nan mester a bandona e tereno unda tur e beneficionan aki tabata warda pa esnan di turno den poder bin cosecha. Honestamente, e peligro ey semper ta presente. Nos no ta cana tras di ningun bandera politico pa kere cu esnan cu nos lo faborece no ta bay comete e mesun delitonan di cual ta acusa esnan cu tabat’ey. Ta p’esey tambe cu nos ta keda boga, reclama y exigi ‘transparencia’ den maneho di e empresanan estatal, y nos ta contento cu e termino aki a bira un di e clavenan pa e gabinete aki, como guia pa nan periodo di gobernacion…, basta nan cumpli. Si no, nos no ta dal ningun stap dilanti y tur e bunita promesanan aki ta keda na exactamente esey: promesa.

Di otro banda, e partido opositor ta lamenta cu aparentemente e mandatario no ta haci esfuerso pa reapertura di e refineria. Si nan no ta cansa di e critica aki, nos no por cansa di bisa e cos manera e ta, y esey ta cu reapertura ta depende di e posibilidadnan real pa habri esaki, y cu e condicionnan obhetivo ta totalmente en contra. Ta bira tempo pa nos concentra riba kico ta reemplaza e refineria, punto.

Otro bataya grandi ta e asunto di maneho di desperdicio. Na e momento aki e partidonan di coalicion no a duna di conoce ainda unda nan ta para, pero ta imaginable cu pa mantene e coalicion na bida, lo mester para tras di e propuesta ministerial. Esaki ta parce nos un escogencia logico tambe, pasobra pakico busca problema den e coalicion, si finalmente e compania oponente, cu ta e unico cu tin instalacion apto pa separa desperdicio, lo por tin bon oportunidad pa gana nan caso den corte, a base di e principio di competencia desleal y creacion di privilegio pa e compania estatal. Gana den parlamento ta un cos, gana den corte ta ‘otros cien pesos’.

Y tin un interogante mas. Segun e schema cu Raad van Advies a divulga y cu nos a publica recientemente, e compania estatal ta bira responsable pa procesa (casi) tur desperdicio. Nan ta prepara pa esey? Cu nos sa, no tin un instalacion manera e compania rival tin y cu momentaneamente ta ser usa den un acuerdo mutuo. Awor, e idea ta cu gobierno ta bay inverti miyones (cu nos placa) den un instalacion similar, o nan ta bay cumpra e instalacionnan di e compania priva, cu no mester esaki mas, si e ley aki haya implementacion tal manera e ta describi actualmente?

Nos ta yegando na e punto unda di berdad sano huicio mester prevalece. Den e mundo aki no tin solucion perfecto pa nada, y nada no ta bin pornada, tur cos ta costa. Y, manera nos a bisa na otro oportunidad caba, nos a mira basta destruccion di capital a tuma lugar caba. Esey ta conta tanto pa e proyecto di Bouldin & Lawson, como pa e proyecto di gas di EcoGas. E unico cos sensato cu e partidonan den e conflicto aki mester haci, ta sinta na mesa y negocia un solucion cu ta garantisa existencia di ambos, cu e pensamento cu ningun di e opcionnan, ni e incinerator ni exportacion di desperdicio ta duna solucion pa semper. Si no, nos no sa ken ta gana, pero sa si ken ta perde: anos ciudadano.

 

LEAVE A REPLY

Please enter your comment!
Please enter your name here