Ayera den oranan di atardi, e pais tabatin dos manifestacion di cual algun maestronan tabata forma parti dje.

E maestronan a expresa cu nan ta cansa di haya promesanan cu minister di Enseñansa, Armando Lampe no a cumpli y pa e motibo aki nan a haci entrega di un manifiesto na e Prome Minister Evelyn Wever-Croes na porta di Bestuurskantoor.

Den compania di representante di Simar, Josephine Albertus y Magaly Brito di Seppa, Soraya Waterham den representacion di e maestronan presente a lesa e manifiesto den e cual nan a expresa diferente punto tanto na Conseho di Minister como na Parlamento di Aruba.

Nan a pidi atencion pa e diferente preocupacion cu e maestronan tin pa cu e maneho cu ta ser hiba pa e Minister di Enseñansa actual, Armando Lampe pero cu lastimamente e simannan ta pasa y nan no a ricibi ningun reaccion ni un alivio pa cu e preocupacionnan cu nan a vocifera.

Di mesun manera, el a pidi atencion pa e manifiesto cu nan mes a haci entrega e dia 3 di juli pasa

Unabes cu Presidente di Parlamento, Ady Thijsen a ricibi for di man di e docente Soraya Waterham, e manifiesto na nomber di ‘Maestronan Preocupa’ el a compromete cu nan ta bay analisa nan contenido y nan lo tuma un decision riba dje.

Sinembargo e docentenan tabata skeptico pasobra prome cu Parlamento a baha cu reces nan a yega di manifesta dilanti Parlamento. E biaha ey tambe nan a entrega un manifiesto cu ainda nan no a haya contesta. E echo cu e biaha aki Presidente di Parlamento a priminti pa duna nan un contesta den termino di maximo dos siman; nan a hay’e mucho tempo. “Nos kier accion; y accion awo!,” Waterham a bisa.

Presidente di Parlamento a bisa cu ta berdad cu e maestro a bin varios biaha pa expresa nan malcontento. E ta argumenta cu e biaha ey, el a ricibi nan manifiesto na luna di juni ultimo, den un periodo cu e docente mes a bay cu vakantie y tambe Parlamento a bay cu reces.

Awor cu nan tur t’ey, e ta haya cu ta oportuno pa e comision di enseñansa analisa e manifiesto di e docentenan y atende cu nan preocupacion. Principalmente mirando cu e muchanan mester keda central. Ademas, nan como Parlamento mester asumi nan responsabilidad; y nan ta bay trata e manifiesto cu prioridad, segun Presidente di Parlamento.

 

1 COMMENT

  1. Loke ta stranjami ta cu cada bez MEP ta den Gobierno, maestronan ta manifesta: ora AVP ta den Gobierno nan ta sera wowo y fiesta: Green Parties all the way: si ta mi fout di ripara, pordonami. E Gobierno aki ta hasi lo imposibel pa tapa buraconan cu otro a pasa habri, pa ora hende lubida, bolbe vota AVP.

LEAVE A REPLY

Please enter your comment!
Please enter your name here