Mediante un video live cu minister di Turismo, Dangui Oduber a haci ayera mainta riba Facebook na Palm Beach dilanti e toren, el a anuncia e siguiente fase di e proyecto di aki den cual ta buscando artist cu lo por pone un toke di nan arte.
E mandatario a informa cu e prome fase a keda cla caba, caminda nan a traha e plataforma cu ta ser usa tanto pa hende local como pa turista for di añanan caba, y cu den ultimo lunanan por a mira cu e prome fase di e renobacion di e plataforma a ser culmina.
Segun Oduber a bisa, e segundo fase ta trata di un invitacion na artista local pa usa nan creatividad y presenta ideanan di kico por pone riba e toren, cu na e momentonan aki ta di color blanco. “Cua ta e diseño cu comunidad kier mira of cua ta e diseño cu nos mester pone?”
Anteriormente tabatin e bandera di Aruba y turista tabata haci uso di dje pa saca potret y publica nan riba social media. Esey tambe ta e motibo pakico nan ta haci un yamado na artistanan local pa participa den e request of proposal (RFP) pa asina nan por haya un idea of pensamento di kico mester pone riba e toren pa bira un atraccion turistico back den area di Palm Beach.
Minister Oduber a informa cu for di ayera caba nan a publica riba su social media e invitacion aki denomina “Palm Beach Tower Art Project” dirigi pa e artistanan local cu lo kier forma parti di esaki. “Esaki ta un bunita proyecto pa nos showcase no solamente na nos mercado local, sino tambe na nos turistanan y p’esey nos ta extende e invitacion pa cuminsa participa durante 10 dia, y despues ora nos haya esnan cu kier participa, nos lo haci un evaluacion cu un comision y finalmente den un luna aproximadamente e trabao oficial por cuminsa.”
