Gamma It Solutions ta e compania cu den un periodo di tres luna lo bin cla cu e software pa introduci e sistema di ESTA (Electronic System for Travel Authorization) na Aruba.
Siman pasa minister di Husticia, Arthur Dowers a firma e convenio aki cu Frank Baks di Gamma pa asina tur ciudadano di henter mundo – cu excepcion di e ciudadanonan Hulandes- cu lo desea bishita nos isla lo mester yena e aplicacion di ESTA adelanta, sino nan no por drenta Aruba. E mandatario no a descarta cu despues e mesun ciudadanonan Hulandes lo tin cu cumpli cu e exigencia aki tambe.
E mandatario di Husticia tabata sincero pa admiti cu ESTA no ta un instrumento pa frena cualkier acto di delincuencia; pero si e lo yuda preveni pa personanan di afo por bin comete acto di delincuencia riba nos isla. Segun sr. Dowers mayoria di delincuentenan cu a comete acto di criminalidad riba nos pais a drenta via nos terminal aereo.
P’esey prome cu un tipo di persona asina kier drenta Aruba, e mester yena un aplicacion digitalmente via ESTA y nan ta pre-screen tur informacion. Si nan ta haya cu tin algo cu no ta cuadra, e aprobacion di ESTA lo wordo nenga. Minister Dowers ta indica cu e ‘datapage’ di ESTA na Merca logicamente ta mucho mas grandi cu esun cu nan kier introduci eventualmente na luna di juni venidero.
Tampoco no mester traha un concepto di ley pa bin cu ESTA, sino cu e mesun cuadro legal existente riba entrada y deportacion di hende, ta duna facultad pa e mandatario por bin cu e sistema aki cu no ta un visa, pero si uno cu ta pre-screen nos bishitantenan.
Sistema ESTA Aruba
E mandatario ta laga sa cu gobierno tabatin pensa di bin cu e sistema di ESTA pero nan no tabatin e fondo necesario pa bin cu ne. Sinembargo Gamma a ofrece di bin cu e sistema aki sin cobra inicialmente nada. E deal cu gobierno a cera cu e compania aki di IT consultancy y software development ta cu Gamma lo cobra un suma di casi 16 mil florin mensual pa nan servicio of mantencion; y parti di e placa aki ta sali for di e mesun ciudadano cu ta aplica pa un ESTA Aruba.
“Aworaki nos a yega na un negociacion cu e compania caminda cu nos no mester paga nada na e momento akinan pa introduci e proyecto. Nos ta paga na momento cu e proyecto ta cla y cuminsa funciona.”
Ainda no tin detayenan riba e exigencianan pa aplica pa un ESTA Aruba; tampoco cual lo ta e tempo vigente di dje. Pero eventualmente e lo ta dos aña considerando cu e ta basicamente un copia di e modelo Mericano.
Sr. Frank Baks di Gamma a bisa cu nan ta un compania cu experiencia riba e tereno aki, ya cu nan ta esun cu a yega di introduci algun software pa aeropuerto di Aruba y tambe pa nos region. Nan kier contribui –segun Baks- pa haci Aruba mas safe y mas liber di criminalnan.
“Nos ta hopi orguyoso cu nos por haya oportunidad di e gobierno di Aruba pa nos por implementa e sistema aki”, el a bisa. E sistema aki ta yuda pa sa si ta hendenan cu no ta welcome na Aruba. E desaroyo rond mundo ta cu paisnan ta introduciendo sistemanan asina y “Aruba ta canando hopi dilanti cu otro paisnan den region”, el a declara.
