Diferente caso di violencia excesivo di parti di polis a capta nos atencion den e ultimo dianan. Den e proceso pa clarifica kico exactamente a tuma luga, ta importante pa e autoridadnan encarga cu investigacion por haci nan trabao trankilamente. Den esaki respetando derecho di e esnan acusa plenamente, no por y nos no lo desea otro. Nos como custumber lo no bay ‘jump to conclusions’ tocante algo cu ta bao investigacion ainda. Sin embargo, ta necesario pa na cierto momento por detecta si e casonan aki tabata meramente incidente, o cu nan ta señal di un fenomeno mas amplio den cuerpo policial.
Pa cuminsa nos mester constata cu na tur pais cuerpo policial ta encarga cu mantene orden y den esaki tin autorisacion pa uza violencia, incluyendo arma di candela. Actua, contestando y manehando violencia ta algo inherente na trabao policial. Polis anto tin semper como tarea pa anda cu sabiduria cu violencia, pa aplica esaki mas poco cu ta posibel, scogiendo na cada momento e instrumento corecto pa uza den e situacion specifico ey. Pues si ta posibel haya cooperacion di un persona cu pa un o otro motibo mester keda deteni, ta importante evalua si e persona ta dispuesto pa bay cu polis sin resisti y sin presenta ningun peligro pa e agentenan of otro persona. Seguidamente ta contempla e otro medionan, por ehemplo di domina un persona fisicamente y pone boei, te na uza di arma, incluyendo arma di candela den cierto situacion unda no por otro.
Pero, prome cu tur cos, ta necesario pa un agente policial sa na tur momento den ki situacion e ta. Un mal evaluacion por hiba na momento cu violencia, di cualkier banda, ta escala innecesariamente. Un aspecto hopi importante den trabao di polis ta cu nan ta traha den ekipo, unda nan mester por confia ciegamente riba otro den situacion di peligro. Sin embargo, ambiente di hermandad cu mester existi, no mag bira nunca un ambiente den cual ta apoya o stimula metodonan di violencia excesivo den situacion unda esaki no ta hustifica. Loke ta bisa aki ta en berdad facil pa expresa, pero den practica ta resulta un ‘fine line’ pa cana riba pa esun cu mester hacie.
Un ehemplo: si den cayente di un lucha pa aresta un persona, algun golpi di mas cay, por mira esey como algo cu por sucede. Pero esaki nunca mag conduci na tolerancia pa violencia contra un persona deteni, cu no por ta violento mas y por lo tanto tampoco por defende su mes. Agredi un persona asina ta algo sumamente repudiabel y e miho manera pa percura pa e no sucede ta impone constantemente un disciplina di hero den training y den trabao. No por existi ni riba caya, ni den warda di polis un ambiente cu ta tolera e tipo di comportacion ey. E mester ta parti di codigo di honor di tur polis cu agresion ta ser uza na midi, contra hende cu ta agredi, nada mas, nada menos.
Ta di crucial importancia cu esunnan cu ta den e posicion pa vigila y cuida e ambiente y actitud corecto ta haci nan trabao manera mester ta. Esey ta trece nos cerca e responsabel pa percura cu agente policial ta uza autoridad y arma na su disposicion na un manera sensato. Den preparacion di polis mester semper dedica atencion na esaki; nos no conoce curriculum di educacion di polis pero nos ta tuma esey sin mas como un hecho. Otro cos ta kico ta sucede den e resto di trayecto, unda e agente policial hunto cu su coleganan ta traha den un ambiente cu si of no ta stimula un actitud corecto. Den e practica di tur dia no ta facil pa mantene un actitud corecto semper, y ehemplo di coleganan ta hopi importante, den sentido negativo y positivo.
Den tur e asunto aki, prensa tin un papel importante tambe. Mester raporta e casonan di eventual uzo excesivo di violencia di banda di polis cu maximo obhetividad. Di un banda, no tin pakico sconde algo si di berdad el a tuma luga. Di otro banda, no ta necesario pa presenta actuacion policial mas grave cu e ta. Nos tin un bon ehemplo di un incidente cu a tuma luga recientemente den un local nocturno, cu tabata habri ainda despues di orario. Riba e video cu a circula ampliamente por a mira claramente con polis ta keda agredi pa un persona, sin contesta su agresion, pero esey no tabata den e comentarionan.
E incidente a mustra si cu awendia semper tin un telefon cu por graba tur cos cu polis ta haci y nan mester ta consciente di esey ora nan ta haci nan trabao. Material audiovisual no ta gaña y por ta prueba clave den cierto caso. Esey no ta kita cu bao di tur e wowonan ey, e agente policial mester haci loke e mester haci. Ta di spera cu finalmente e autoridadnan concerni por declara honestamente cu e incidentenan reciente tabata en berdad incidente, y cu a haci loke ta necesario pa percura pa violencia excesivo no por pasa na domina ambiente den e cuerpo.
