Home Regional Den ultimo aña inflacion na Venezuela a yega na 24.571%

Den ultimo aña inflacion na Venezuela a yega na 24.571%

237

Asina Asamblea Nacional a informa dialuna pasa, hunto cu Rafael Guzman, presidente di e comision di financia, ken a presenta un balansa di e hiperinflacion den ultimo aña aki. Segun e estadisticonan cu e comision di financia a elabora un ciudadano mester gana 200 salario minimo pa e por cubri e costo di e canasta basico pa un famia.

E inflacion desde luna di mei aña pasa te mei 2018 a acumula te 24.571% y e por bay cera aña cu 14.000% segun Fondo Monetario Internacional (IMF) a declara anteriormente. Si e cifranan di Asamblea Nacional ta corecto, y no tin mehoracion economico den e segundo parti di aña, e inflacion por ta considerablemente mas halto. E parlamento legitimamente eligi a dicidi cuminsa pa traha un balans di e situacion, a base di indice inflacionario y otro topiconan economico, debi cu Banco Central di Venezuela tin mas di 2 aña sin publica cifra di inflacion.

Parlamentario Guzman a expresa cu ‘e golpi mas duro’ di e inflacion tabata na luna di mei pa loke ta e productonan alimenticio. “Esey a registra un subida di prijs di mas di 200%, debi na tur e atakenan di gobierno riba e produccion nacional. Den un pais cu tabata produci 80% di loke nos ta come, awendia casi a yega na solamente 25%, y hasta e 25% ey ta bao atake y menasa di gobierno”, el a bisa. E cifra di inflacion general pa mei 2018 tabata 110%.