Un empleado di Iguana Joe’s restaurant den Royal Plaza tabata cla cu trabou dialuna anochi laat y canando direccion Paardenbaaistraat unda el a parkeer su auto ora e atraco a tuma luga.
E ta splica despues cu e no tin e moda pa bay paga pa e parkeermeter ora e ta bay traha, y ya no tin otro manera di staciona su auto mas leu y cana. Pero e biaha aki tres hoben riba bais a saca un arma di candela riba dje. Nan a bay cu su cartera cu no tabatin mucha placa aden y huy den direccion di Rancho.
Un rato despues e team special cu polis a lanta pa motibo di e atraco riba casino Excelsior, a bay controla e bario. Na un cas conocido di adicto den Ranchostraat cu Visserstraat a haya dos bicicleta y jacket nan preto. Polis lo haci mas investigacion pa determina si esaki nan a keda uza den e atraco.
