Departamento di Asunto Social ta anuncia cu nan tin un team multi-disciplinario den cual tin seccion pa e hoben y mucha, seccion di famia y pareha. Tambe seccion adulto cu ta duna yudansa psicologico familiar na cliente.

Enid de Kort, terapista di famia y pareha, ta duna di conoce cu mirando e situacion actualmente di coronavirus, a introduci un cambio ‘drasticamente’ unda cu nan mester adapta nan servicio.

Actualmente Departamento di Asunto Social no por duna servicio fisicamente na nan cliente, sinembargo De Kort a bisa cu a habri un liña di telefon pa publico y no solamente pa esunnan cu ta cliente caba di DAS, pero ‘Aruba en general’.

Pa tur esunnan cu ta sinti problema psicologico, esunnan cu tin ansiedad, sinti nan mes depresivo of tristo pa e situacion actual; si tin pleitamento den famia nan por yama na 528-1150 y tuma contacto cu e team cu a pone pa e seccionnan aki.

Nan lo duna guia di con pa deal cu e situacion aki.

A puntra con lo por haci esaki si tin mas den famia pasando pa un situacion fastioso. De Kort ta contesta cu e ta bay pa e persona cu ta pidi e yudansa.

“Normalmente ta bay cu henter un famia, pa motibo aki nos ta keda habri. Si ripara cu tin mas yamada nos lo mester bay online. Nos lo mester cambia e servicio pa nos papia cu mas miembro di famia”, el a bisa.

Sinembargo cu na momento cu un miembro di famia yama, nan lo tende e persona y purba di dun’e algun tip. De Kort a duna ehempel pa reconce cu na momento cu ta cansa y ta haya mal beis, no ta momento pa papia cu e casa of yiu.

E ora e persona por bay medita, bay haci oracion of cana den mondi pa calma su mes, despues cu relaha e por atende cu pareha of yiu. Esey ta e tips cu ta duna. Nan ta recomenda pa esunnan cu tin ansiedad purba di bin cu structura den cas, lanta trempan pa haci cosnan na cas y purba duna tips.

Tambe recomenda pa famia sinta bou palo, hunga wega, cana den mondi pa asina relaha. “Claro no bay den grupo grandi”, pero esaki ta sirbi pa calma e stress. Anto esey ta e miho manera pa aborda e situacion.

Pa comunica cu DAS tin diferente manera, via telefon, medionan social. Nan lo keda activo pa ofrece nan servicio cu cualkier situacion cu nan por atende cune. Na momento cu sigui cu proceso nan lo bay mester bay mas innovativo, caminda lo bay riba medionan online.

LEAVE A REPLY

Please enter your comment!
Please enter your name here