Diadomingo marduga e toque de queda a termina pa e Dominicanonan. E medida tabata parti di e intentonan pa contene e propagacion di Covid-19 na e pais, te awor cu poco exito. Sin embargo, diadomingo venidero tin eleccion presidencial y parlamentario, cu ta requeri otro ambiente den ultimo siman.

E Decreto 135-20, di 20 di maart pasa, tabata limita movimento di ciudadano den oranan di anochi, sin embargo esaki a funciona parcialmente so. Ni toque de queda, ni Covid-19 cu te awor a mata 726 persona na e pais, no a detene e poblacion.

Polis Nacional a registra durante e 99 dia di vigencia di e decreto presidencial, 92.159 persona aresta pa sali riba caya durante e oranan di e medida, sin cu nan tin permiso o excepcion pa tal, manera pa trahadornan di salud, di produccion y distribucion di alimento o combustible.

Diabierna pasa presidente Danilo Medina a dirigi su mes na e pais pa informa entre otro cu lo no bolbe na e estado di emergencia cu tabata vigente pa varios luna y cu ta caba dia 1 di juli.

Aunke el a reconoce cu e epidemia di Covid-19 a bira mas grave desde cu a cuminza cu flexibilisacion di medida 20 di mei pasa, e presidente a mustra riba e problemanan pa haya parlamento aproba e resolucion cu ta duna Medina e posibilidad di limita movimento di ciudadano atrobe, si ta necesario.

Mientras ta permiti mas actividad comercial pa mantene economia moviendo, awor tambe tin e presion pa permiti campaña electoral den ultimo siman promer cu eleccion presidencial y parlamentario di diadomingo proximo. Esaki por hiba atrobe ma violacion di reglanan manera distanciamento social, na momento cu no tin control riba coronavirus ainda.

LEAVE A REPLY

Please enter your comment!
Please enter your name here