Departamento Meteorologico di Aruba ta vigilando un ola tropical den parti oost di Caribe, actualmente oost di Bonaire. E Sistema tin un chance grandi (80% y 90%) di sigui desaroya y bira un ciclon tropical den proximo 2 te 5 dia.

 

Pa 2pm ayera, e ola tropical (wave) aki tabata situa mas o menos na 66W, cu ta oost di Bonaire. Cu e curso actual e wave aki ta bay move den parti oost di Caribe entre awe y mañan diabierna. E wave ta ser acompaña pa awasero modera te pisa y mal tempo, y ta move west- noordwest rond di 30 pa 35 km/h.

 

Impacto riba e tempo local:

Por spera biento fuerte den rafaga durante awasero modera te localmente fuerte cu por ser compaña pa lamper cu strena; ademas awasero por causa molester na diferente parti paso ta spera cantidadnan entre 15 pa 35mm.

 

Pa e parti maritimo, por spera lama modera te poco bruto na parti oost te noordwest cu olanan entre 5 pa 9 pia. Un aviso pa boto chikito lo drenta na vigor pa e parti oost te noordwest di costa awe tardi 6or. Ta pidi operadornan di boto chikito pa bay cu cautela na sobra partinan y tambe cerca of den bisindario di awasero of lamper cu strena.

Tempo tropical significante:

1. Horcan major fiona tabata situa na 660 km zuidwest di Bermuda, y ta move noord-noordoost cu 24 km/ora. Fiona no ta un peligro pa region local.

2. Tormenta tropical Gaston tabata situa na 500 km west noordwest di Azoren y ta move oost- noordoost cu 33/km ora. E sistema aki no ta di importancia pa Caribe.

3. Un ola tropical fuerte den parti oost di area di Caribe tin un chance grandi di sigui desaroya den proximo 2 te 5 dia mientras e ta move west-noordwest.

4. Un ola tropical fuerte a baha for di costa Africano y tin un chance medio grandi pa desaroyo den proximo 2 te 5 dia.

Potencial di awasero pa proximo 24 ora:15 te 35 mm; localmente esaki por varia.

Departamento Meteorologico di Aruba lo continua vigilando e sistema aki y si ta necesario emiti e boletinan tocante e sistema aki.

Potretnan di Aruba Weather Watch.

LEAVE A REPLY

Please enter your comment!
Please enter your name here