Desaroyo turistico hotelero na San Nicolas lo empuha economia den e areaa

Dialuna 11 di februari, Minister encarga cu Desaroyo teritorial, Infrastructura y Medio Ambiente sr. Otmar Oduber a trece informacion di un proceso andando pa un desaroyo na San Nicolas. Na varios ocasion a mustra riba e hecho cu Gobierno ta sigui pusha pa por crea un desaroyo berdadero pa San Nicolas.

‘Como Minister encarga pa 7 aña y mey cu nos turismo, consehero di turismo y como un persona cu a sostene turismo den transcurso di añanan den Parlamento, a sigui cu e empeño aki. A anunica na diferente ocasion den medionan di comunicacion y encuentronan cu comunidad cu nos ta kere den desaroyo turistico hotelero pa e area di San Nicolas. Particularmente mirando e discussion cu tin continuamente di cu of ta crea e negoshi pa trece cliente, of ta trece cliente pa crea e negoshi.’

Situacion di San Nicolas
Mas cu 40 aña a mira cu si no ta pa e refineria e ta dificil pa hiba y mantene negoshi na San Nicolas y comerciantenan no ta inverti si no tin hende pa cumpra. Di otro banda dificil hende ta haci compras na San Nicolas pa motibo di falta di negoshi adecua. Considerando e situacion aki a yega na e conclusion cu mester por bin un un desaroyo cu por para riba su mes.

Varios Gobierno den pasado a bisa cu ta para pa un desaroyo di industria turistico na San Nicolas (hinca den nos plan di Ruimtelijke Ontwikkelingsplan (ROP) 2009). Den e ROP nobo a haci algun cambio, a minimalisa e area indica como desaroyo turistico, y comberti e area restante como un area di naturalesa. Ta trata di mas o menos 70% – 80% di tereno comberti den ‘natuurgebeid’ cual ta significa cu no lo por tin desaroyo den e area aki mas.

Adicionalmente Minister Oduber a splica cu tin un area unda cu pa mas cu 10 aña caba tin 7 pa 8 percela pa desaroyo turistico conforme ROP bieu y nobo. Di e ‘lot’ nan aki 5 di nan a wordo compromete sea via di un ‘optie’ of ‘overeenkomst’ door di Gobierno anterior na un cantidad di 2100 camber (parti di e 7000 cambernan menciona den pasado). Gobierno actual a combersa cu e diferente gruponan aki pa mira e capacidad financiero pa nan realisa un proyecto na San Nicolas.

A base di e combersacionnan aki a realisa cu esnan cu por tabata limita y e ‘overeenkomsten’ no tabata cuadra cu e ‘optie’ nan duna tampoco. Consecuentemente a duna e personanan un periodo pa por cumpli cu nan ‘overeenkomst’. Pa cual despues di e proceso aki a logra pa limita esaki na 1 solo proyecto. Anteriormente asigna como esun di Bahia Principe cu durante di e ultimo periodo di Gobierno anterior tabatin un overeenkomst pa un hotel di 950 camber all – inclusive. A sinta na mesa y negocia y a bisa cu ta dispuesto pa duna un propiedad di hotel all – inclusive pa locual cu ta necesario pa e ta exitoso na San Nicolas mirando e situacion di cu no tin un desaroyo pa depende riba dje. Importante pa menciona cu e posibilidad di hotel all – inclusive na San Nicolas tambe ta hinca den e ley di all – inclusive. Ilustrando e continuidad cu tin den henter e maneho pa desaroya e area.

‘Ripple effect’
Minister Oduber a splica cu e desaroyo turistico hotelero aki lo tin riffle effectpa e area. Automaticamente ora cu tin hotel mester di ‘car rental’, tour operators, watersports, souvenir shops, restaurants y mas! Mayoria di locual cu no tin actualemente.

Analisando e situacion y recomendacionnan a scoge enbes di 950 camber all – inclusive, e cantidad cu ta necesario pa hacie factibel, cual ta 600 camber. Esaki ta hacie un negoshi sigur y e ta fit dentro di e maneho di ROP bieu y nobo. E punto di salida ta 1 all – inclusive pa empuha e economia na San Nicolas pero depsues di esey den e siguiente fase (2) lo mester bay den e tipo di hotelnan European Plan (EP) cu no ta tur cos inclui.

Pa conclui Minister Oduber a splica cu e proceso actualmente ta den e fase cu e inversionistanan interesa mester cumpli cu e condicionnan. A mustra cu e ta un prioridad pa Gobierno y e maneho cu tin pa e area pariba di nos isla. Tambe cu kier pa e desaroyo aki tuma luga manteniendo tur e reglanan cu Ministerio a pone pa salvaguardia nos medio ambiente, flora y fauna.

 

You May Also Like

12814584_998463740244957_3282757720282959229_n.jpg

Prome di Juli proximo Beach Policy ta keda oficialmente introduci

Despues cu hopi preparacion a tuma luga durante e ultimo 2 añanan awor ta ...

Ear plugnan ta keda necesario durante carnaval

Den cuadro di temporada di carnaval 64, Quota Club Aruba ta haci un yamada ...

Ley di oficialisacion di Papiamento tin restriccion ‘discriminatorio’

A pesar cu 14 aña pasa,  Papiamento a bira un idioma oficial na Aruba, ...

One stop shop pa adiccion

E edificio colorido cu minister Arthur Dowers di Husticia a habri ayera na B. ...

Na luga di basha abou, mester drecha y embeyece markthallen

E bendedonan di e mercado bieu di fruta conoci manera markthallen tin cierto preocupacion ...