Ayera den oranan di atardi, medionan di comunicacion local a keda convoca na oficina di Censo na L.G. Smith Baolevard pa asina informa comunidad tocante introduccion di un rijbewijs nobo y con e procedura ta hinca den otro cu ministerio di Husticia.

Minister di Husticia, Andin Bikker a expresa cu pa motibo cu tempo ta desaroya y instrumentonan di seguridad ta desaroya, den cuadro di mehora servicio pa publico y agilisa e proceso di rijbewijs, esey tabata un di e prioridadnan cu nan a pone como meta.

Igualmente Bikker a menciona cu esaki a tuma hopi trabao, pero cu nan a logra y asina tambe nan a modernisa diferente leynan cu ta aplicabel y cu awor pronto lo tin un version digital di rijbewijs.

El a splica cu e rijbewijs nobo tin hopi elemento di seguridad. Di loke ta trata e diseño, nan a pone e emblema di e libertador Betico Croes y otronan cu ta tipifica e sociedad Arubiano. “Nos ta hopi contento cu e documento aki, cu den diferente aspecto ta ilustra diferente parti di nos cultura,” Bikker a anuncia.

Prome minister, Evelyn Wever-Croes cu tambe tabata presente den e presentacion, a bisa cu den e proyecto aki nan ta percura pa e servicio cu nan ta brinda pa comunidad bay na un forma mas agil y mas eficiente; y pa e producto cu e cliente ta bay haya – den caso aki e rijbewijs – ta uno cu ta conta cu tur regla di seguridad cu tin mester.

Pa loke ta trata e proceso entre Bureau Examen Rijbewijs (BER) cu Censo, Sharin Luydens, director di Censo, a señala cu a traha un sistema central cu desde aña 2014 pa awor no tabatin caminda na unda tabata registra pa examen y awor si. E examen ta wordo registra door di Polis y ora ta hinca esey den e sistema, e ta bay den un database y e ora ey, e persona ta traha su afspraak na website di Censo pa haya su rijbewijs pa prome biaha.

Tambe el a manifesta cu tin un retraso di 500 rijbewijs cu tambe ta bay wordo hinca den e database aki pa Cuerpo Policial na su departamento di BER. Pa loke ta trata pa personanan cu tin un rijbewijs caba, door di extrae e database di rijbewijs di 2014 pa 2020, Luydens a splica cu nan a hinca esey den e sistema nobo.

“Di e manera aki tin un proceso sigur caminda esey ta bira mas confiabel” Luydens a sigura.

Tambe a trece dilanti cu cada persona den departamentonan tin nan tarea. Tin un control amplio den e producto cu ciudadanonan lo haya den nan man, pa motibo cu no solamente e rijbewijs lo aumenta di calidad pa cu fisico pero tambe lo bira algo mas confiabel.

Pa un persona haya su rijbewijs nobo of renoba esaki, na momento cu no tin nada malo den proceso, ta supone di haya su rijbewijs e mesun dia cu traha e afspraak na Censo.

El a anuncia cu ya caba riba e website di Censo www.censo.aw a pone tur e rekisitonan cu mester cumpli pa haya rijbewijs y desde mañan 1 di december nan lo habri e afspraaknan.

Pa loke ta trata seguridad di datonan, Luydens a specifica cu henter e database ta full un infrastructura di un network di Censo cu ta wordo protegi pa un firewall y esey ta loke ta tene e sistema na defensa, si na algun momento lo por tuma luga un hack.