Durante presentacion di e Relato Anual2023, Prome Minister Evelyn Wever-Croes a toca e topico di e gastonan di su ministerio. Prome Minister a splica cu den e Relato Anual tin un splicacion di tur loke e gastonan tabata, den comparacion cu e cantidad di trahadonan.
Segun un comunicado di gobierno, un critica cu pueblo semper ta trece dilanti, ta e cantidad di persona cu tin trahando den e ministerio di Asuntonan General. Pa cu esaki ta importante pa menciona cu na 2017, cu ta e ultimo aña di Gabinete Eman, Mike Eman tabatin den su ministerio un total di 147 persona riba payroll. Esaki ta un total di 11.323.300 florin na gasto di salario.
Compara cu e cantidad halto di personal cu Mike Eman tabatin den su ministerio, Prome Minister na aña 2023 tabata tin solamente 23 empleado den su ministerio pa un total di 2.521.184 florin na gasto di salario, cu ta 8.8 miyon florin menos. Tambe e comunicado ta menciona cu a pesar cu e total di trahado, compara cu e gobierno anterior ta asina abou, trabounan ta hopi mas eficiente den e gobernacion actual.
E compromiso di Gabinete Wever-Croes ta pa tin un maneho financiero responsabel y a demostra durante e añanan di gobernacion di a cumpli cu e compromiso aki, segun e comunicado. Prome Minister a splica cu como mandatario di pais Aruba, e ta prefera di fortifica e departamentonan cu profesionalnan pa haci e trabou, y no tin 147 persona riba “payroll” cu mas sigur mirando e cantidad halto aki, no por tabata fisicamente den e edificio di bestuurskantoor trahando.
