Desorden bipolar ta wordo conoci tambe como enfermedad maniaco-depresivo cu ta un malesa caracterisa pa cambionan di humor, cumpramento y pensamento.

Ta consisti den un of mas episodio maniaco cu of sin episodio di depresion. E por afecta persona di cualkier edad. E persona cu ta sufri di desorden bipolar tin cierto patronchi den su manera con e ta comporta, por ehempel bo lo ripara e tin cambio repentino di energia, di su beis y di su habilidad pa haci cosnan experenciando nivelnan eleva di beis (conoci como episodionan maniaco) y despues ta cay den episodionan severo di depresion.

Estado maniaco

Un estado maniaco ta ora e persona tin un cantidad ilimita di energia, ansiedad y e ta bira rabia. E sentimento di ta constantemente carga, e ta experencia perdida di necesidad di drumi y pensamento nan straño.

Di otro banda e sentimento di depresion ta laga e persona cu un tristesa profundo cu ta haci e bida normal imposibel. E persona ta perde interes den mayoria di cosnan cu e ta gusta haci. Tambe ta bini e cansancio y sentimento cu su persona no ta sirbi pa nada. Hunto cu esaki ta bin un perdemento di concentracion den loke ta haciendo. E persona te hasta por tin gana di mata su curpa.

P’esey e ta wordo yama un desorden “disorder” pasobra tin cambionan di humor cu ta varia. E episodionan aki por dura algun luna pero tin biaha tin evento cu ta dura un ora so. Por ehempel un persona por ta den un episodio maniaco pa dos luna y di repenti, sin ningun motibo, e ta cay den depresion.

Usualmente mayoria di dia ta un mix di momentonan tristo y feliz. Sin embargo algun biaha tin dia unda tur loke bo ta haci ta causa bo yoramento. Of otro dia bo ta asina contento. Of tin dia unda bo ta henter dia cu depresion. Pero tambe tin dia unda bo ta asina contento y excita cu bo no por para keto? Hopi biaha e sorto di emocion nan ey asina opuesto na otro, por pone den nos mente un pregunta: Mi ta un hende bipolar? Ora e duda aki ta bin na bo mente, bo por cuminsa pa haci algun pregunta bo mes.

Preguntanan pa contesta

Mester compronde cu nos tur ta pasa den bida den cierto cos cu ta pone nos tristo of alegre, pero e mester bira un preocupacion ora e emocion nan ta asina radical, por ehemplo di un tristesa profundo na un alegria inmenso den un rato di ora.

– Tin ora bo ta asina distrai cu bo ta haya dificultad pa concentra den un cos pa un periodo largo di tempo?

– Bo ta sinti cu bo tin hopi mas energia di loke normalmente bo tin?

– Bo ta sinti cu algun biaha bo ta papia mas lihe di lo normal?

– Bo ta sinti algun biaha masha rabia mes sin algun causa?

– Bo ta drumi menos tempo di loke normalmente bo ta drumi. Pero asina mes e siguiente dia bo ta haci bo trabao normal sin sinti cansa of cu soño?

– Bo ta sinti cu bo pensamento nan ta bula asina lihe cu ni si bo ta purba, bo no por para di pensa tanto cos?

– Bo ta sinti asina hyper cu hende ta bisa bo pa calma un poco?

– Bo ta ripara cu bo ta papia asina duro y mas lihe cu normal?

– Bo ta sinti asina activo, cu bo ta kere bo mes capaz di logra mas di loke normalmente bo ta haci?

– Bo ta sinti un interes no usual den sexo?

– Bo ta haci algun cos cu otro nan ta considera un risico halto?

Si bo contesta tabata positivo den mayoria di e preguntanan ariba, por ta un eventual indicacion cu bo por sufri di un desorden bipolar. Bo mester bishita un profesional den area di salud mental. Corda si cu e condicion nan aki mester ta constante presente por lo menos pa tres siman. Mester revisa hunto cu e profesional, den kico bo ta pasando aden antes di saca un conclusion tocante si bo ta sufri of no di desorden bipolar.

Potret: New York Times.

LEAVE A REPLY

Please enter your comment!
Please enter your name here