Despues cu DIMAS a duna di conoce e maneho nobo riba otorgamento di permiso pa trahadonan stranhero, y otro medidanan a base di conseho pa cu e situacion di Covid, prome cu fin di aña a tuma luga un reunion cu presencia di varios instancia di gobierno y representantenan di e sector horeca, esta Aruba Food & Beverage Association (AFBA) y tambe AHATA.

E tabata un reunion preliminar, ya cu nan a programa un reunion pa dia 7 di januari ultimo. Pero e reunion aki a keda posponi pa tuma luga den transcurso di e siman aki. Tanten gobierno a pidi pa e sectornan aki por duna nan opinion riba e maneho cu a keda concipia, ya cu e mandatario ta haya cu hopi biaha e ta bay ariba percepcion, pero e realidad no ta wordo mira.

E ta kere cu unabes cu e partinan aki ta bay riba e contenido di e maneho, nan por bin cu recomendacion riba dje. E mandatario a bisa cu e situacion cu nos a presenta pa causa di Covid no tin un manual cu por a indica cu e maneho cu tal pais ta hibando ta esun perfecto. Sino cu cada bes, nan ta siña di nan mesun experiencia. “Esey ta pone cu e maneho cu nos a bin cune, e no ta skirbi den piedra,” el a expresa.

Minister di Husticia a bisa cu e ta habri pa scucha recomendacion di AFBA y AHATA, y si por ehempel, den e lista di excepcion cu e ta consider’e uno amplio pa diferente profesion y funcion labora mester añadi algo, nan lo consider’e tambe. Kiermen si tin algun di nan cu gobierno a lubida of cu no a realisa, nan ta habri pa esaki.

Nan ta hayando tambe di diferente organisacion algun recomendacion, ya cu no tin miho cu esun cu ta bin for di e veld aki, el a bisa.

 

 

LEAVE A REPLY

Please enter your comment!
Please enter your name here