E director ehecutivo di e Autoridad di Energia Electrico (AEE)  di Puerto Rico, Justo González Torres, a anuncia ayera cu e capacidad di generacion di e servicio di electricidad na Puerto Rico a alcansa 72,6 %, despues di finalmente restaura e sistema den e casco urbano y zonanan cercano di e municipio di Ciales.

“E siman aki nos a redobla nos esfuersonan den e trabao cu a realisa pa aumenta nos capacidad di generacion y pa energisa mas sector y comunidad riba henter e isla,  incluyendo e casco urbano di Ciales, cu tabata e ultimo municipio cu nos tabata falta pa hiba electricidad pa nan”, González  a bisa den un comunicado.

E funcionario a agrega cu e porcentahe di cliente cu servicio electrico a alcansa 58,7 % y cu ademas a drenta den operacion e unidad 3 di e Central Palo Seco, na Cataño, prome cu e tempo calcula y cu un capacidad di 212 megawatt.

Tambe, pa continua cu e tareanan di lanta e sistema electrico na e isla, cu a keda destrui pa horcan María, González a anuncia cu pa dia 8 di januari proximo, lo yega 200 di 1500 trahado di compania di electricidad publico y priva di Merca cu lo trece ekipo y material.

El a agrega cu AEE lo ricibi 6.000 transformator mas cu lo yega prome cu fin di luna di januari, sumando asina casi 14.000 palo di luz, concreto y staal galvanisa, como tambe  330 miya di cable conductor.

“Nos ta confia cu e yegada di mas trahado, material y ekipo di e companianan di electricidad di Merca y cu nos plan di restauracion, nos lo avansa substancialmente e trabaonan pa reconecta e servicio di energia na tur nos clientenan lo antes posibel”, González a afirma.

El a añadi cu AEE ta spera di tin entre 4.500 y 5.000 persona trahando den tereno como parti di e brigadanan pa continua reconstruyendo e infrastructura electrico di e isla y atende sector y comunidadnan cu ainda no ta conta cu servicio electrico.