Management di Ahata ta rabia. No ta algo cu lo conmove mundo, pakico anto ta menciona e incidente cu a duna bida na nan malcontento? Pasobra e ta un di e señalnan cu no ta cambiando hopi ainda den e manera cu gobierno, o entidadnan gubernamental, ta trata ciudadano o partnernan den sociedad y economia, cu cual supuestamente nan ta mantene bon relacion di trabao. No necesariamente mester ta di acuerdo cu otro riba tur asunto, ta p’esey mes ta asina importante pa yega na acuerdo tocante e asuntonan riba cual si mester esey. E demas cosnan ta keda pa loke nan ta: opinion. Nos ta ‘agree to disagree’ y ta sigui traha. Talvez cu tal o cual partido no a haya apoyo pa nan punto di vista, pero asina bida ta.

E motibo pakico nos ta dedica atencion na e expresion di protesta di e gremio menciona ta pasobra e ta indica un situacion di no cooperacion leal y sincero, contrario na loke tabata sucede na consulta positivo den e aña dificil cu a keda tras di nos. Ey tabatin hopi consulta, den bon ambiente, pa yega na otro pa loke ta e puntonan di accion relaciona cu e crisis di Covid-19, cu a afecta henter nos economia y sigur e sector clave cu ta motor di nos economia. Nos ta na altura cu e gremionan den nos economia tabata partner den e consultanan pa yega na e Masterplan gubernamental, cu den e proximo añanan mester sirbi como un guia pa no solamente recupera nos economia manera e tabata, sino mas bien mehora, innova y move bay den un direccion mas positivo ainda cu loke nos tabatin ‘pre-Covid’. Nos sa cu lo tin cinico cu ta bisa cu nos tambe ta cuminza cay den e trampa di vocifera lema y consigna bunita, cu no ta significa nada si despues di papia, y yega na acuerdo, no tin accion. Esey por ta e caso, no por kere ciegamente den bon intencion, si no tin nada su tras, pero si no ta cuminza cu bon intencion, anto no tin nada mes.

Kico asina tabata e cosnan cu a discuti ampliamente den e consulta cu mas di 200 persona, pa yega na e Masterplan? Cu e representantenan di sector priva, hopi tocante con kita e bareranan cu burocracia ta pone cu ta stroba un funcionamento mas fluido di nos empresanan. A papia ampliamente riba loke ta conoci como e notorio ‘red tape’. Aki ta trata di un serie di problema cu ta varia di cosnan cu mester cambia a traves di legislacion, loke logicamente ta tuma su tempo, pero tambe otro asunto cu ta toca mas bien e manera di anda cu cierto asunto, cu por cambia a corto plazo, si e departamento o entidad concerni ta dispuesto di cambia su maneho, sin cambia ley, pa tur claridad.

E tema cu a bira e motibo pa e clash entre e gremio, y Banco di Seguro Social y Departamento di Labor, ta e instruccion duna na e gremio, pa pasa pa su miembronan, cu nan mester anda di cierto manera cu dianan di vacacion segun ley, en vista di e subsidio di salario, cu lo ta cambia e orario di trabao di un empleado. Banda di cu e gremio tabata y ta pensa cu e argumentonan di e dos entidadnan no ta valido, e punto principal ta cu a pidi un splicacion di e dos entidadnan y hasta la fecha nan no a hay’e. Nos no ta bay ripiti e calificacion cu e gremio a duna na e actitud di e entidadnan, pero ta constata si cu ta den e tipo di cos aki, di practica di tur dia, cu e bon colaboracion entre sector priva y gobernacion mester t’ey pa nos por avanza. Lamentablemente nos ta mira cu no ta atende e asunto, ta scoge pa un silencio inexplicable, mientras nan lo mester tabatin e argumentacion huridico caba na e momento cu nan a haya e asunto asina importante cu mester a bay un carta pa e gremio concerni. Ademas, si ta asina importante e issue aki tabata, pakico no a comunica esaki cu tur dunador di trabao na Aruba? No ta algo cu ta toca sector hotelero so? Un di e preguntanan cu ta surgi awor ta: e gremio mester supuestamente instrui su miembronan segun e indicacion di SVb/Labor, sin por duna nan un splicacion legal contundente y convincente? Mester simplemente bisa nan “hacie asina, pasobra nan di”?

Pa pone bon cla un biaha mas pakico nos ta trata e incidente aki, ta pasobra e ta ehemplar pa e situacion cu nos tin den e colaboracion entre sector publico y sector priva. Y esaki ta funesto pa logra yega na e tipo di colaboracion cu nos mester pa hiba nos economia dilanti, y esey ta hustamente loke mas nos mester na e momento aki. Ta absolutamente necesario pa nos move bay den un tereno cu reglanan legal estricto, pero cu un cierto claridad indiscutible, y cu ta keda comunica di un manera corecto, cu e debido splicacion. Nos por dedica hopi tempo na intercambia bon intencion, pero e actitud basico di respeta otro como partner den un pais, no como contrincante, ta algo clave. Nos no ta mir’e ainda.

LEAVE A REPLY

Please enter your comment!
Please enter your name here