Crisis Team cu sesion informativo riba COVID-19 na Parlamento; hydrochloroquine como tratamento ta peligroso

A dicidi pa no uza hydrochloroquine mas desde Mei 2020 di e pandemia di COVID-19  na Aruba, ora cu e tratamento a ilustra mas efecto negativo cu positivo, unda te hasta tabatin un persona cu a muri di curason.

Asina Dr. Bert Rodenberg di Horacio Oduber Hospital, miembro di Crisis Team a informa Parlamento di Aruba ayera tardi. E noticia aki a yama atencion ya cu nunca prome e informacion aki a keda divulga. Sinembargo, e contesta tabata riba pregunta di Parlamentario Ricardo Croes, kende a puntra di con no ta trata pacientnan cu COVID-19 cu hydrochloroquin cu segun su informacionnan, ta yuda den tratamento rond mundo. Esaki a pesar cu World Health Organization a cualifica e remedi aki como peligroso. Y Dr. Rodenberg a confirma e risico.

Aruba ta sigui guia di e organisacion mundial di salud, WHO, cu na Juni 2020 a para tur tratamento cu hydrochloroquin pa tratamento di COVID-19.

Dr. Rodenberg tabata un di e miembronan di e Crisis Team cu hunto cu Prome Minister Evelyn Wever Croes como hefe di e Crisis Team y Minister di Turismo, Salud y Deporte Dangui Oduber a duna un splicacion di e status di e contagio na Aruba, e proceso di vacuna y tambe desaroyo di turismo.

Prome Minister Evelyn Wever Croes a duna un introduccion cortico, ilustrando e desaroyo di COVID-19 cu ta afectando Aruba ya pa un aña. Locual pa Evelyn Wever Croes, kende a bisa cu “nos no ta den un situacion facil,” ta yama hopi atencion ta cu na September 2020 tabatin 1630 caso activo di COVID-19 . E tempo ey, 47 hende a keda hospitalisa y 13 a bay den ICU. Awor aki tin 604 persona registra cu COVID-19, y asina mes, hospital ta yen atrobe, cu 14 hende den ICU.  E presencia di variantenan y e capacidad limita di hospital a conduci cu mester tuma e medidanan stringente. “Nos ta aplicando e sistema di Hammer in the Dance, cu ta nifica cu cada biaha mester pusha e curva, cu ta keda subi y baha. Esey ta locual cu mester sigui haci, esta domina e curva, te ora cu segun expertonan vacuna 85 porciento di nos populacion.”

Prome Minister Wever Croes a ilustra cu ehempel di un cas di cuido na Deventer unda tur habitante y dunado di cuido a keda vacuna ta funcionando liber, sin medida y con e pais Europeo Gibraltar, a elimina practicamente tur medida ya cu a logra vacuna su populacion contra COVID-19.

Hulanda ta yuda cu ICU

Minister di Turismo, Salud Publico y Deporte Dangui Oduber di su banda a bisa cu Aruba no ta pasando den su miho momento pa loke ta e virus. E situacion ta bou control, pero hospital ta sintiendo e presion cu e casonan nobo, den e ultimo simannan aki. E Minister a bisa cu Hulanda ta bay yuda cu personal adicional pa amplia e capacidad di ICU te na 22. Lo kier yega na 33 cama, pero esey lo nifica cu mester un team di 45 persona adicional pa yuda cu e camanan aki. “Nos tin un plan di contingencia, cu si e situacion bira agudo, lo por manda pacient cu COVID-19 pa Colombia, y den caso extremo, pa Hulanda.

Campaña di vacuna

E campaña nacional di vacunacion ta bayendo bon. Aruba a ricibi 11700 vacuna for di Hulanda na Februari y a uza tur. “Di tur pais den Caribe Hulandes, Aruba tin mas interes pa e vacuna. Tin 36 mil hende registra pa haya e vacuna.” E Minister a splica cu Hulanda ta determina cuanto vacuna Aruba ta haya. Hulanda mes ta cumpra vacuna den forma central hunto cu otro paisnan di Union Europeo y di e cantidad cu e pais ricibi, ta manda pa e islanan den Caribe. E prome cuater grupo di vacuna cu Hulanda ta manda ta e vacuna di Pfizer, y e di cinco lo ta un otro. E vacuna di Pfizer ta esun di tecnologia MRNA, mientras cu otronan manera Janssen ( Johnson & Johnson) ta basa riba e tecnologia tradicional.

E Minister ta contento con  a logra hisa nivel di vacunacion y cu por yega na 2000 inyeccion pa dia. Realidad ta cu no na e momentonan aki no tin suficiente vacuna pa tur cu a registra. Pero ta depende y ta gradicido na Hulanda pa manda e vacunanan.  E Minister a bisa cu tin un anhelo pa un bida normal, y e vacuna lo por yuda logra esaki. “Nos kier logra cu 85 porciento di nos comunidad haya e vacuna, pa asina manera Israel y Gibraltar por flexibilisa e medidanan.” Particularmente pasobra e ta necesario pa mehora e proyeccion pa turismo. E campaña di vacuna ta contribui na mehora e perspectivanan pa turismo por recupera mas lihe posibel.

Personal di hospital

Dr. Rodenburg di su banda a ilustra cu 70 porciento di e personal di hospital a tuma e vacuna. E speransa ta pa mas por vacuna. “A purba tur momento. Mañan ta bay ta e ultimo sesion na hospital mes. Tin hopi cu a prefera di warda pa wak e resultado. Hopi cu tabatin duda, a dicidi toch na ultimo momento pa tuma e vacuna. Nos ta contento cu e resultado, cu ta 70 porciento.”

E ta importante cu e personal ta proteha, pasobra contrario na e di dos ola di contagio di COVID-19, hospital no a para su cuido regular, algo cu a sosode na September. “Pero nos ta preocupa si, pasobra nos ta yegando nos capacidad maximo,” Dr. Rodenberg a bisa.

MRNA

Parlamentario Ricardo Croes tabatin hopi pregunta riba e vacuna y pakico a scoge pa e MRNA, y puntra pakico no ta uza e combinacion di hydrochloroquin cu zink entre otro pa tratamento. Aki tabata momento cu Dr. Rodenberg a splica cu hopi remedi tin efecto secundario. Hydrochloroquin a resulta di produci efectonan secundario hopi serio pa curason y despues cu un pacient a muri pa motibo di curason, a dicidi pa para e uzo na Mei 2020.

Tambe el a desmenti e sugerencia cu e vacuna MRNA ta cambia DNA di hende,  esta e composicion genetico di un hende,  manera entre otro Parlamentario Ricardo Croes a sugeri. Locual e vacuna MRNA ta haci ta crea un pida DNA di e virus di COVID-19, cu ta stimula un curpa crea proteina contra COVID-19. Pues e curpa ta haya un reaccion contra e virus, y e pida di DNA cu e vacuna MRNA  mes a manda den curpa, ta keda destrui despues y ta sali di e curpa di hende. Y te ainda, a pesar di tur e testnan di seis luna, e vacuna no a mustra di ta crea mas problema, ni pa personanan cu artritis y reuma, Dr. Rodenberg a splica. “Tur ta efectivo. E vacuna ta proteha hende di efecto serio cu COVID-19 por trece cune. E virus lo no desaparece. Pero, su transmision lo baha y despues di tempo e cantidad di mutacion tambe lo baha. Mas transmision tin, mas hopi e virus ta cambia,” Dr. Rodenberg a ilustra, enfatisando cu te ainda, e vacuna di Pfizer ta bon pa e variantenan cu ta na Aruba.

E reunion informativo a mishi diferente tema, for di turismo te e maneho di calamidad cu tin cu tene cuenta cu otro casonan eventual, cu ta ilustra e importancia pa hospital di Aruba keda cu capacidad pa sigui duna cuido.