Dos persona cu detector di metal a horta un tesoro na balor di £3 miyon, cual expertonan a bisa tin potencial pa ‘cambia historia’.

George Powell y Layton Davies a coba saca como 300 moneda na un campo na Eye, cerca di Leominster, Herefordshire na 2015. Nan no a declara e hallazgo di 1,100 aña di antiguedad, cual ta pensa ta un di esunnan mas grandi te awo, sino a bend’e na traficantenan.

Nan a ser condena di robo y di sconde nan hallazgo. Bendedonan di moneda, Simo Wicks y Paul Wells tambe a ricibi condena pa sconde e hallazgo.

E tesoro a inclui un renchi di oro di siglo 9, un armband di cabes di dragon, un lingote di silver, y un pendiente di piedra di cristal. Apenas 31 moneda – na balor di entre £10mil y £50mil – y algun piesa di joyas a ser recupera, pero mayoria ainda ta perdi.

Fiscal Kevin Hegarty QC a bisa cu ya pa awo, e tesoro no lo wordo poni den otro mas.

Durante nan huicio na Worcester Crown Court, Powell di 38 aña di edad for di Newport, y Davies di 51 aña for di Pontypridd, a nenga di intencionalmente ignora e Treasure Act, cual ta exigi pa hallazgonan significativo wordo declara.

Expertonan ta bisa cu e monedanan, cual ta Saxon y ta kere a ser scondi pa un vikingo, ta duna informacion fresco tocante unificacion di Inglatera y ta mustra cu tabatin un aliansa cual anteriormente no tabata pensa cu ta existi, entre e reynan di Mercia y Wessex.

“E monedanan aki ta permiti nos reinterpreta nos historia na un momento clave den creacion di Inglatera como un reino singular”, segun Gareth Williams, curator di moneda medieval na British Museum.

Ora Powell y Davies a haci nan descubrimento na juni 2015, nan no a informa e agricultor cu tabata doño di e tereno, sino a tuma contacto cu traficantenan pa haya sa e balor di e obhetonan. Un luna despues nan a tuma contacto cu National Museum of Wales, pero a declara apenas un moneda cada un, y tres piesa di joyas.

Ambos a bisa cu hallazgo di 300 moneda tabata djis un rumor, pero sospecha a lanta y polis a cuminsa investiga. Nan a recupera potret elimina for di celular di Davies cual a mustra e tesoro intacto den un buraco recien coba.

Dos reino bisiña, pero separa, a emiti e monedanan den siglo 9: Wessex y Mercia. E tempo ey Wessex tabata goberna pa e famoso Alfred the Great, y Mercia pa e menos conoci Ceowulf II, kende ‘djis ta desaparece for di historia sin rastro’ ora a dera e tesoro alrededor di aña 879, segun Williams. Sin duda, e monedanan ta demostra cu tin un aliansa entre Alfred y Ceowolf, como cu nan tabata comparti diseño di moneda.

“E hallazgo aki ta di importancia nacional den unificacion di Inglatera. Ta yega na momento cu vikingonan tabata atacando a gran escala”, Williams a bisa.

“This is a find of national importance from a key moment in the unification of England.

Ta conoci cu un ehercito vikingo tabata den e area aki e tempo ey, atacando Wessex y Mercia, incluyendo Battle of Edington, Wiltshire na 878 contra Alfred the Great, un aña prome cu a dera e tesoro. Williams ta kere cu probablemente a dera e tesoro pa scond’e for di vikingo y Anglo Saxons, pero pa algun motibo no a logra bay bek pa recuper’e.