Manera cantidad di otro evento, un concierto anual di tributo pa John Lennon cu ta tuma luga na su ciudad adopta di New York dia 9 di october, riba su fecha natal, a ser forsa pa bay online pa motibo di pandemia di coronavirus.

No tabata un opcion pa cancela e evento, no riba locual lo tabata e di 80 cumpleaños di Lennon, alabes e di 40 aña di tributo.

“E idea di no celebra John, di stop despues di 39 aña, nunca a crusa mi mente”, segun Joe Raiola, e productor di e tributo y director artistico di e organisacion Theatre Within.

Raiola tabatin reserva e Town Hall pa e show e aña aki. Cu e pandemia forsando esaki pa transmiti gratis di 7pm pa mey anochi ET riba e website LennonTribute.org, e evento por ricibi mas exposicion cu nunca.

Presentacionnan graba di Jackson Brown, Patti Smith, Natalie Merchant, Rosanne Cash, Jorma Kaukonen, Shelby Lynne, Taj Mahal, Marc Cohn, Joan Osborne y otronan lo ta inclui – hopi di shownan den pasado, pero algun di nan nobo.

Sin benta di ticket, organisadornan lo solicita contribucion pa programanan cu ta beneficia hende afecta pa cancer. Theater Within y Gilda’s Club ta ofrece tayernan gratis, manera skirbi cantica, arte y meditacion na pashent y sobrevivientenan di cancer, y na muchanan cu a perde nan mayornan na e malesa.

Raiola y otro amigonan a cuminsa nan tributo informal na Lennon na 1981, menos di un aña despues cu e ex-Beatle a wordo asesina.

Esaki a keda chikito, sikiera te cu 24 aña despues, na momento cu viuda di Lennon, Yoko Ono a lesa un storia tocante e tributo den New York Daily News y a yama Raiola, pa en efecto puntra, kico bo ta haci?

Hayando sa mas tocante e tributo el a ofrece sosten, y den un declaracion ayera a bisa cu ‘esaki ta un forma maraviyoso pa honra John y e balornan pa cual e tabata para’.

Cash, un conciudadano di New York kende a ser honra cu e premio John Lennon Real Love Award na 2018, a toca e canticanan di Bealthes ‘I’m Only Sleeping’ y ‘Look at Me’ den tributonan pasado.
“Ta e sorto di cosnan cu bo no semper ta mira, unda e mesun hendenan ta presente tur aña”, Cash a bisa den un entrevista. “Nan ta devoto na esaki. No ta djis pa motibo di John, ta pa motibo di respet pa loke nan ta haci y e comunidad cu nan a crea.”

Raiola ta kere cu impacto di Lennon tabata ‘sismico’ y cu e idealnan den cual e tabata kere no a muri cune. “Paz, amor, igualdad di genero y husticia social – esey nunca ta bira bieu”, el a bisa.