Manera semper nos ta celebra Dia Internacional di Prensa, loke ta duna nos un oportunidad pa evalua si den e aña cu a pasa nos a mira mehoracion den papel positivo cu medio di comunicacion mester hunga den comunidad, y si esaki a conduci na mihor informacion na publico en general.

E conclusion preliminar ta cu nos no ta mira avance, ni tampoco deterioro den derecho di prensa pa acumula y publica informacion. Si tabatin algun incidente cu a mustra riba un tendencia cu nos no mester. Un di nan tabata cu un mandatario a dicidi cu e no ta tuma pregunta mas di reportero di un cierto medio di tendencia politico contrario, loke a genera bastante discusion. En general nos ta kere cu e tipo di ‘boycot’ aki no ta nan lugar, y e posible argumento cu e pregunta tin un tono y tendencia politico realmente no ta relevante. Si mester tene rueda di prensa solamente pa medionan di comunicacion aproba pa gobierno, anto por keda sin tene rueda di prensa y djis manda un recado di prensa digital pa tur medio. E incidente aki a ilustra cu tin momento cu ta lubida cu nos ta, o en todo caso mester ta, funcionando den un democracia cu ta garantiza pluralidad politico. Esey no ta kita cu den e encuentro cu prensa tin regla di conducta aceptable, di ambos banda, pa mantene e ambiente dentro di norma.

Den e discusion cu a surgi tocante papel di prensa y kico ta tolerable, a bin dilanti atrobe e intencion di gobierno pa bin cu un tipo di ‘mediaraad’, segun loke a expresa un tipo di conseho, conforma pa prensa mes, pa establece norma cu cual tur prensa mester cumpli. Aki atrobe, nos tin cierto preocupacion, pasobra mester ta net gobierno, cualkier cu ta sinta como tal, cu kier bin cu regla con prensa mester comporta? Pakico prensa lo mester tin e confianza cu cualkier forma di organiza prensa den un structura oficial lo no termina unda tur structura crea pa gobierno(nan) a termina: den nombramento di aliado politico den posicion clave y manipulacion contra esnan cu no ta di agrado di e gobierno di e momento ey… Semper tur organizacion, entidad y conseho institui pa gobierno(nan), tabata y ta escena di bataya y intriga politico y no tin ningun motibo pa pensa cu un intento pa structura supervision di prensa a traves di un iniciativa gubernamental lo bay termina di otro manera. Entre dos malo anto, ta mihor pa scoge e malo di un prensa cu mester sa di educa su mes, y cu tin trabao pa haci den e sentido ey. Nos a mira algun exceso unda sensacionalismo a prevalece unda dignidad humano mester a haya prioridad. No tur medio tin mesun criterio pa material fotografico y audiovisual,. Y no tur medio di comunucacion tin mesun criterio pa loke ta averiguacion di veracidad di informacion, previo publicidad, pero nos no ta kere cu crea structura oficial di cualkier indole ta e respuesta corecto pa mehora esey.

Kico gobierno mes por haci?

Envez di preocupa pa con prensa ta funciona, lo ta recomendable pa pone mas atencion riba e aspectonan unda gobierno mes por mehora comunicacion y informacion en general. Pa haci esey ta necesario si pa cambia e mentalidad cu ta reina di promer cu januari 1986, cu menos informacion duna na comunidad, pues na prensa tambe, mihor esey ta pa e gobernante di e momento. Nos no por comparti e pensamento ey. Si esey lo ta e rumbo corecto, anto mester conclui cu secretismo ta e normalidad y e ora anto nos no tin pakico di papia mes di transparencia. Pero, manera nos por a comprende, gobierno actual mester por a saca conclusion positivo for di e rapport contundente di National Integrity System (NIS), cu gobierno a financia hunto cu Stichting Deudelijk Bestuur Aruba. Ta importante pa e cantidad di fayo, sigur riba tereno di falta di transparencia, haya mas follow up cu e mero confirmacion di ta apoya y aplaudi e trabao haci. Y si tuma accion ta importante, anto por cuminza cu e cosnan cu no ta costa placa…, al fin y al cabo, nos no ta desea pa e argumento contra ta cu no tin recurso presupuesta pa por actua.

Kico asina por pensa den e cuadro aki? Por ehemplo, cuminza cu un maneho nobo di transparencia pa algun cos. Uno ta cu ta pone tur cuenta anual y otro publicacion importante di tur entidad publico na disposicion di publico, despues di a percura pa ademas e entidadnan aki, tur sin excepcion, tin nan cuenta anual cla na tempo, manera nan estatuto ta stipula. Esaki no ta costa nada, pasobra nan ta traha digitalmente caba…

E otro tema ta e manera cu ta maneha e ley cu ta goberna entrega di documento na comunidad: Landsverordening Openbaarheid van Bestuur (LOB). Te awe ainda ta maneha e ley aki segun e aparente criterio cu ningun ciudadano ta haya un documento bao di e ley aki den su man, a menos cu e cana e caminda hudicial y gana su caso. E ley su intencion no ta esey pero ta asina nos politiconan ta interpreta e ley aki, cu nan no gusta y cu, nada straño, ta Hulanda a obliga gobierno di Aruba introduci. Si gobierno cuminza cumpli cu e transparencia gratis aki, anto nos por papia di avance.