Tur hende ta realisa cu esaki ta un situacion serio y nos ta mustrando e disciplina pa ‘flatten the curve’. Cantidad di casonan positivo di Corona virus pa diadomingo ta 54 den 921 test haci.
Esaki ta pone cu total Aruba a yega na 563 caso positivo na unda cu 446 ta activo. Si compara esaki cu e cantidad di diasabra cu ta 113 y e cantidad prome cu esey ta 133, nos ta mira cu e cantidadnan a cuminsa baha. Esaki ta mustra cu aunke e cantidad di testnan a keda mas o menos igual, asina mes e cantidad ta bahando considerablemente, segun un comunicado di gobierno.
Prome Minister Evelyn Wever-Croes: “Esaki ta locual nos kier logra, pa nos cuminsa baha e cantidad di caso y cu cada dia nos tin menos caso nobo. Traha riba e recuperacion di esnan cu tin e virus pa asina nos por ‘flatten the curve’ y ohala despues ‘crush the curve’ tambe. Esaki ta e resultado di un strategia hopi agresivo y testmento masal. Esaki ta danki na tur esnan cu ta trahando hopi duro den e area di salud y den tur e testing y e resultadonan di laboratorio.
Un danki tambe na e comportacion di nos hendenan cu a tuma conscientisacion mas na serio, nos por mira cu cayanan ta hopi mas trankil. Nos ta mira cu tur hende ta realisa cu esaki ta un situacion serio y nos ta mustrando e disciplina cu semper nos a pidi Aruba pa demostra. Pa esaki un danki di curason. Nos a yega di hacie caba y nos lo bolbe hacie. Ban nos tur hunto‘flatten the curve’.
