Diahuebs lo bay ta un dia historico pa Aruba, asina a comenta Minister di Enseñansa, Ciencia y Desaroyo Sostenibel, Armando ‘Rudy’ Lampe durante un conferencia di prensa, ora el a referi cu e dia ey ta cuminsa implementa Scol Arubano Multilingual na nivel nacional.

Esey ta nifica cu tur scol preparatorio den prome aña ta bay cuminsa cu e sistema multilingual, unda cu, di un manera cu weganan y canticanan, nan lo ricibi lesnan di Papiamento, y ademas ta bay tin contacto cu Ingles, Spaño y Hulandes.

Lampe a splica cu pa aña 2030 tur scol na Aruba – manera nan Plan di Educacion Nacional di 2030 a señala – lo ta scol multilingual. Ta comproba cu ora un mucha crece den un ambiente di aprendisahe multilingual, su desaroyo cognitivo ta hopi mas halto.

Den e conferencia di prensa tabata presente, como invitado, Richard De Mey, Arubano destaca como e ‘Miho Maestro di Idioma’ den exterior, specialista den Multilinguismo cu ta papia 8 idioma. De Mey a expresa cu e ta hopi contento cu e decision di cuminsa cu scolnan multilingual, ‘nos mester corda cu cuater idioma nos tin y tur cuater ta di nos’.

 

1 COMMENT

LEAVE A REPLY

Please enter your comment!
Please enter your name here