Mester bin un revision total di AZV, ta opinion di Presidente di STA, Diego De Cuba. De Cuba ta pendiente e discusionnan riba reduccion di gasto di AZV y tambe e introduccion di e lista positivo y e contribucion propio.

Motibo ta cu e dos ultimo factornan aki lo por yuda reduci e gastonan di AZV manera cu ta e condicion cu Hulanda a pone pa duna Aruba sosten di likides, esta cu mester baha e gastonan di AZV cu 60 miyon.

“Mester bin un revision total. E por ta un Algemene Ziekteverzekering , pero si bay pone tur cos den balans, e cantidad di placa cu ta bay eyden y locual ta gasta, practicamente por bisa cu AZV ta den bancarota. Gobierno no por sigui hinca placa den dje. E no ta balansa y no por yega na un balans den e forma aki tampoco.”

Den concepto di De Cuba, AZV den su forma actual ta stroba e clima di inversion di Aruba tambe. “Nan no kier carga cu e peso. Tin compania cu ta dispuesto pa duna seguro adicional, pasobra AZV no ta ofrece tur servicio. Pero ta cuanto compania tin e forsa financiero pa ofrece paketenan di seguro asina? Mester ta un compania financieramente fuerte pa por ofrece un pakete di seguro adicional.”

E hecho cu AZV no ta financieramente balansa ta sinta na e hecho cu e salarionan na Aruba no ta halto. Un gran mayoria di trahado, como 70 porciento, ta gana 2,500 florin of menos. “E contribucion di e trahadonan aki den e fondonan di AZV, AOV y otro no ta hopi. Pero net e grupo aki ta esnan cu ta pone mas presion riba e fondonan colectivo aki. E placa ta caba,” De Cuba a bisa.

Dos aña y mey

STA a haci un calculacion abstracto di un persona cu semper ta keda na un sueldo minimo. Si un persona asina traha pa 30 aña y despues ta baha cu pensioen cu 65, “den dos aña y mey el a come tur locual e cu su dunador di trabao a contribui na e fondo di pensioen di SVB. Esey ta ilustra cu e sistema no ta sostenibel y no ta por nada a aumenta edad di pensioen y lo mester bolbe aumenta edad di pensioen,” De Cuba a bisa. “Si no bin cu un revision total, no por scapa e fondonan. Y esnan cu tin un salario mas halto tampoco lo acepta. Si mi duna ehempel di mi mes, mi contribucion na AZV, hunto cu esun di mi dunado di trabao ta suma 8 mil florin pa aña. Lo mi por cumpra un seguro medico mucho mas atractivo. Ami ta haya esnan cu ta contribui mas tin derecho di mas beneficio. Pero ken ta ami.”

Aunke cu e ta zona straño pa un sindicalista papia di diferenciacion den cobertura di seguro, De Cuba ta bisa cu mas bien su enfoke ta pa mira con pa scapa e fondo. Pasobra di e forma aki AZV ta bancarota y tur hende ta perde. “Ta yega un momento cu AZV ya no por wanta e presion. Kico lo kier e ora? Pa bolbe aumenta prima. E ta un situacion cu ta rekeri un revision y solucion rapido.”

 

LEAVE A REPLY

Please enter your comment!
Please enter your name here