Diferencia entre Hulanda y Aruba?

Tabatin un trafico intensivo entre Hulanda y Aruba den e dianan aki. Prome secretario di estado Dijksma encarga cu transporte, cu a bin consulta su colega encuanto e situacion na InselAir, y na e organo supervisor local di aviacion. Ayera bishita y rueda di prensa di ministro di Asunto Interior y di Reino, Plasterk. Tur dos a tene rueda di prensa riba nan mes, nada hunto cu nan coleganan di Aruba.

Esey por indica cu nan no ta di acuerdo cu otro, o simplemente nan no ta desea desviacion di atencion pa presencia di otro cu ta cambia e conversacion? Esey nos no sa, pero tabata obvio si cu nan a papia cla y raspa. Dijksma mas cu Plasterk, cu ta mantene un posicion reconciliador pa cu prome ministro. Riba pregunta di prensa con a para cu e relacion di trabao entre gobernador y prome ministro, Plasterk tabata cortico. Asina leu cu e sa, nan ta reuni. Esey no ta bisa tur cos, pero nos lo sigui esey di cerca ainda.

E no a bay tanto den detaye riba e asunto di aviacion ya cu su colega a trata e asunto caba. Pero tabatin un motibo mas. Un dia despues di e rueda di prensa di Dijksma, prensa a ricibi tanto e carta cu Dijksma a manda pa Tweede Kamer como tambe e rapport traha pa e expertonan Hulandes cu a analisa tanto e situacion na Curaçao como na Aruba. Esaki a haci cu loke tabata di haya sa, a haya sa. Algo refrescante por cierto, compara cu e actitud terco di nos gobierno(nan) cu ta kere cu en principio tur cos den gobernacion ta secreto, a menos cu no por otro cu divulga informacion, anto e ora na forma selectivo y filtra politicamente.

Di e rapport por bisa cu e ta señala den forma sintetisa pero cla, kico ta e problemanan cu nos tin, no cu un compania priva, sino cu e autoridadnan cu mester supervisa e operacion di e compania aereo. Y esaki naturalmente ta indica gobernacion deficiente, y ta net esaki nos gobierno(nan) ta purba tene scondi pa nos. Te awor aki e ministro encarga na Aruba no a bisa masha cos tocante e asunto, y realmente no ta relevante pa e bisa algo tampoco, pasobra esey e Hulandesnan a haci caba. Ta di spera cu en todo caso e no cana stroba, y laga nan caba di haci e trabao cu aparentemente nos hendenan no por. Esey ta asina? Nos no por?

Laga nos expresa nos mes, no cuidadoso pero si exacto. Nos no ta kere cu e problema mayor ta e capacidad y conocimento tecnico cu nos hendenan mester tin cu ta traha den e ramo aki. E problema mayor semper ta cu e ambiente ta traha aden ta uno di ‘ons kent ons’ loke masha lihe mes ta conduci na un ambiente di no ta demasiado duro y critico cu otro. Esey ta djis un paso aleha di un ambiente unda un actitud demasiado complaciente ta hiba na problema, y na perdida di bida humano. Esey riba su mes caba mester ta suficiente motibo pa no desea di actua asina. Pero ban keda den e tema di transparencia. No ta straño cu, mientras tin tanto pregunta for di Tweede Kamer riba e asunto aki, nos no ta tende casi nada di nos apreciabel parlamentarionan.

Nan no ta interesa? Of nan no ta gusta cu e Hulandesnan a bin mete atrobe den asunto ‘autonomo’? Esun cu ta pensa cu e Hulandesnan no tin nada di bisa den e asunto aki, ‘think again’. Na prome luga ta trata aki di tratadonan internacional den cual Reino ta responsabel pa cumplimento di henter Reino. Ademas e compania di aviacion ta opera dentro di nan pais, como cu Bonaire ta parti di pais Hulanda. Y muy probablemente for di banda Mericano lo mester a bay un advertencia na Den Haag pa atende e asunto prome cu algo realmente malo sucede. Pero e dos bishitanan aki a duna mas momento cu ta mustra nos riba e importancia di transparencia. Algun siman pasa nos prome ministro a duna un show unda a zwaai cu un carta di CAft cu ta bay di acuerdo cu e proyeccionnan di presupuesto 2017. Euforia, sin duna claridad, pasobra ni e simpel promesa cu nos lo a haya e documento, e no a cumpli. Ayera Plasterk ta duna claridad bisando cu Hulanda no ta cla pa cumpli cu e protocol di Diahuebs Santo, cu ta encera inscribi riba un prestamo di bono di Aruba, pa un interes hopi abao. Segun Plasterk, nan tin poco asunto cu nan kier mira clarifica prome, punto.

Esey ta significa cu por aproba prestamo di mas di 400 miyon florin cu mester e aña aki, pero no ta bin alivio pa e suma di mas di 200 miyon cu nos ta pagando e aña aki, pasobra lo mester busca placa riba mercado atrobe pa 5 – 6%. Pero kico lo a costa premier Eman pa laga e weganan infantil atras y bisa nos di biaha con e cos ta. Cara el a perde awor di tur manera.