Dimas den proceso di digitalisacion tambe ta cambiando e maneranan pa haci pago pa nan productonan. Den futuro un gran parti di tramite lo tuma luga online. Tambe e departamento a admiti cu a cay atras pa procesa prolongacion di estadia turistico ultimo lunanan.

Dimas conhuntamente cu Departamento di Impuesto a anuncia ayera mainta durante un conferencia di prensa cu desde ayera tin un loket di impuesto na Dimas. Na e loket aki clientenan di Dimas por haci pagonan pa diferente producto y servicio cu e departamento ta ofrece. Impuesto lo accepta solamente pagonan via debit card pues no lo anda cu cash na e loket. Luenne Gomez-Pieters hunto cu Kathy Ruiz-Paskel, directornan di Impuesto y Dimas respectivamente a splica cu esaki ta parti di un esfuerso mas amplio di colaboracion entre e dos departamentonan.

E pagonan cu lo por wordo haci den e loket di Impuesto na Dimas lo ta restitucion, leges y tambe pago di deposito. Te cu januari tambe lo por sigui haci pagonan di Dimas na tur e MFAnan y hulpbestuurkantoornan. Despues di e periodo sra. Gomez-Pieters a expresa cu impuesto lo acepta pago di tur tipo di servicio y producto di Dimas solamente na nan loket na Dimas. Asinaki e departamentonan kier reduci e tempo y esfuerso cu ta tuma pa pasa na diferente departamento prome cu un aplicacion pa un permiso wordo acepta.

Den futuro tur pago di Dimas lo tuma luga exclusivamente na Dimas

Sra. Paskel-Ruiz a delinea cu pa aña e departamento ta haya mas o menos 15 mil peticion pa productonan cu ta rekiri pago. Pues e volumen di persona cu lo acudi na e loket e departamento tin expectativa cu lo keda mescos. Si e departamento lo ta capacita pa maneha e trafico aki na Dimas mes, e director a splica cu ‘bo tin cu imagina cu riba un dia di trabou normal e cliente ta acudi pa nan cita. Pa dia nos tin 125 pa 180 cita mas o menos. Pero no tur servicio ta rekiri di pago. E clientenan cu bin Dimas pa paga pa nan permiso por ehempel por bay nan cita despues di haci e pago’.

Pues no t’asina cu clientenan mester pasa di antemano manera awo e proceso ta rekiri, segun sra. Paskel-Ruiz. E persona por djis pasa paga y bay su cita dibiaha. E unico cu lo cambia ta cu no lo rekiri di pasa na otro porta di gobierno pa haci e tramitenan posibel.

Riba e volumen y cantidad di placa cu e departamento ta trece pa caha di gobierno sra. Paskel-Ruiz a splica cu e ta bay den un cantidad di miyones. “E ta depende riba e producto, nos tin producto cu ta 2000 florin, 1200, 100. Fuera di esey bo tin e costonan administrativo. P’esey nos a opta pa haci pago solamente posibel cu debit card y siguientemente online.”

Colega di 24ora.com a puntra si e switch pa no acepta cash lo tin efecto riba personanan cu pa prome biaha ta aplica pa permiso. Esaki debido na e echo cu nan no tin cuenta di banco pa por haci e pago. Sra. Paskel-Ruiz a clarifica cu ora cu un persona aplica pa prome biaha pa un permiso e garante mester atende cu e peticion y tambe e pagonan. E persona cu ta pidi e permiso solamente mester ta presente durante prolongacion, mirando cu pa e prome peticion e garante so mester ta presente cu tur documento.

SIRSA

Manera nos a publica caba den pasado e departamento tin diferente proyectonan andando di cual uno ta e sistema nobo di Sirsa (Sistema Innovativo di Registro di Stranheronan Aruba) a trece cu ne algun retonan pero tambe e sistema ta uno mas moderno. Actualmente e departamento ta den proceso pa haci e tokenan final na e sistema cu lo haci’e posibel pa henter e proceso di aplicacion pa permiso por wordo haci digitalmente. E sistema nobo tambe ta trece cu ne algun cambio cu por mira ya caba den e oficina di Dimas. Tin balienan cu ta ekipa cu tablets y webcams pa por tuma e fingerprint, firma digital y potret digital di e cliente ora di tramita e permisonan.

Mas aleu e corespondencia entre e departamento y su clientela tambe lo bira digital. Esaki e departamento ta purba haci pa combati e fenomeno di permisonan falso. Pues en caso cu un aplicacion wordo nenga e carta di decision lo wordo manda digitalmente via email na cada cliente.

Otro cambio cu lo bin ta pa e permisonan mes, cual lo stop di ta riba papel y lo bira un carnet cu lo por facilita otro departamentonan manera Guarda Nos Costa pa haya informacion corecto y rapido via QR code.

E portal online di Dimas segun sra. Paskel-Ruiz lo ta cla pa cuminsamento di 2018. Sra. Paskel-Ruiz a expresa cu Dimas ta sintando hunto cu otro departamentonan pa asina baha e cantidad di rekisito riba nan lista pa un persona por aplica pa un permiso. Cu departamento di Impuesto mes e colaboracion ta bayendo den direccion cu kier kita e rekisito di busca un formulario A/B/C. “Nos kier purba procesa aki via un porta di atras y comunica cu otro pa no mester haci uzo di e formulario di bekendheid.”

Den cuadro di por aproba un permiso e departamento ta delibera cu diferente instancia: entre otro SVB, Censo y IASA. “Nos ta convenci cu e termino pa por tramita un permiso mester por wordo baha y inversionnan entre otro den sistema di ICT hunto cu colaboracion cu otro departamento ta mustra di duna su fruto encuanto e tempo cu ta tuma pa procesa.”

Tramite di estadia turistico pega ultimo lunanan

Bon Dia a tuma nota di algun desaroyo den parti di prolongacion di estadia turistico, esta cu pa algun tempo e aplicacionnan cu a drenta na e departamento no tabata wordo procesa na tempo. Esaki den algun caso a crea problema pa algun persona cu a wordo perhudica ora di sali Aruba bek. E personanan aki a haya situacion fastioso cu autoridadnan di inmigracion pasobra tabata kere cu e bishitantenan a keda ilegalmente na nos isla. Pues sra. Paskel-Ruiz a contesta bisando cu ‘esaki ta parti di e baby foutjes cu nos a papia di dje aworey.’.

E director a admiti cu en berdad pasobra a cambia pa e sistema di Sirsa e departamento a cay atras pa procesa cierto productonan, di cual prolongacion di estadia turistico tabata un di nan. “T’asina si cu nos ta intercambia informacion semanalmente cu IASA riba kico a wordo pidi y duna na estadia turistico pa asina nan hinca e informacion aki den nan sistema. E ta un cooperacion cu ta canando.”

Sinembargo segun sra. Paskel-Ruiz actualmente e departamento ta canando normal cu e peticionnan cu drenta pa estadia turistico. Esaki ta pa evita cu den futuro turistanan cu bin bek nos isla wordo confronta cu problema.