‘Tabata tin maltrato pero acusadonan a haya suficiente castigo caba’

Diahuebs cu a pasa famia di Mitch Henriquez a dicidi di bandona sala di corte pa motibo cu nan no ta kere mas den husticia Hulandes. Ayera e officier tabata tin su requisitoir pa pidi pa e acusadonan y kico e ta haya di e investigacion cu a tuma luga den corte den e siman cu a pasa. Ministerio Publico Hulandes no a exigi castigo contra e dos polisnan involucra den e maltrato di Arubano Mitch Henriquez cu a fayece na 2015.

Famia di Mitch Henriquez a reacciona riba esaki y ta sumamente desapunta den sistema di husticia cu no lo exigi castigo pa e polisnan. Den su requisitoir, Officier van Justitie a bisa bon cla cu e ta kere si cu tabata tin maltrato pero cu e no ta mira un relacion di esaki cu lo por a causa e morto di Henrquez.

“Es decir cu otro palabra, nan a maltrat’e berdad, pero e maltrato aki riba su mes no lo a significa – segun Officier van Hustitie – morto di Mitch Henriquez. Tambe nan a bisa cu si mester resulta mes cu e polisnan aki lo ta culpabel di maltrato, cu asina mes tampoco Officier lo bay over na exigi ningun tipo di castigo, paso e ta haya caba cu e dos polisnan aki lo a sufri bao di e caso akinan pa dos aña y cinco luna,” Desiree de Sousa Croes ta bisa.

E ta siguiendo e caso aki for di cerca na Hulanda. Pa e motibo aki, sra. de Sousa ta sigui splica cu OM di Hulanda ta pensa cu si hues mester yega mes na e conclusion cu tabata tin un maltrato berdad y nan lo mester haya castigo, nan no ta exigi castigo. “Cual kiermen cu dia 21 di december nos no lo por spera nada otro”, segun sra. de Sousa Croes.

“E minimo cu nan ta bay bisa por ta cu berdad nan ta culpabel di maltrato. E maltrato no a conduci directamente na morto di Mitch Henriquez, y cu en todo caso nan no lo haya castigo. Esaki ta un desapunto hopi grandi seguramente pa e famia y pa mi mes personalmente, e ta realmente increibel”, sra. de Sousa Croes ta bisa. E ta un desapunto hopi grandi riba nos sistema penal segun sra. de Sousa Croes y hopi otronan tambe ta opina, pasobra aworaki e ta mustra cu como si fuera polisnan ta para riba ley. Esaki por mira hopi hende bisa tambe riba e ola di reaccion cu e caso aki a haya ultimamente. Conclusion di tur e rapportnan medico y hasta esunnan di defensa mes ta bisa cu si no lo tabata tin e maltrato y violencia na Mitch Henriquez su curpa, e no lo a muri. De Sousa Croes: “Pues esaki ta logico cu tin un relacion entre e maltrato y morto di Mitch Henriquez. Pero Officier ta mir’e aparentemente diferente.”

Reaccion di famia
Riba pagina di web di abogado Richard Korver por mira un reaccion di e famia Henriquez riba e ultimo desaroyonan aki. Segun e publicacion aki , e famia ta laga sa cu nan ta desapunta y contra e decision aki di OM pa no pidi pa castigo. OM Hulandes a declara cu e agentenan a sufri basta caba e ultimo añanan aki bibando cu e culpabilidad di ta penalmente responsabel pa e morto di Henriquez. Nan ta haya cu e idea cu Mitch Henriquez a muri por medio di strangulacion no tin base mas.

Nan punto di bista ta cu Henriquez a fayece por medio di un sindroma di stress agudo y no debi na strangulacion. Imagennan nobo a sali, segun OM, e imagennan no ta mustra ningun descoloracion. Tabata tin prensa tambe cu wak y analisa e imagen nobonan aki. E famia ta haci un peticion na prensa pa keda activo riba esaki y publica riba dje. E famia ta keda riba e punto cu e morto di Henriquez a wordo causa por medio di maltrato y abuso policial.

Cu no lo exigi castigo y cu e polisnan lo keda cu nan trabao, ta duna un señal hopi robes na e famia mirando e agentenan mes a haci nan mes culpabel di maltrato innecesario. Locual ta stroba e mayornan mas tambe segun e publicacion, ta e hecho cu e oficialnan no a haci nada durante e situacion mirando cu e imagennan mes ta mustra cu e tabata tin mester yudansa. Pues nan a sigui cu nan forsa brutal sin tene cuenta cu nan lo por ta haciendo e persona daño.

E famia lo ta pendiente cu e veredicto cu lo bini december awo. E lema di e famia tanten ta keda: ‘Integridad ta, haci algo bon ora cu bo ta pensa cu ningun hende no ta wak.’

You May Also Like

Caso Speeltuin: ‘Nan merece pa ta henter bida den prizon’

Fayo di comunicacion entre instancianan Ministerio Publico (OM) a pidi hues 15 aña di ...

‘Hobennan tin un potencial inmenso’

“Nos hobennan ta traha di diamante y oro, pero nan no a haya chens ...

tumberito.jpg

Ganadonan di Tumberito Festival 2016

Resultado Tumberito Festival 2016: CATEGORIA INFANTIL: Ganadora: Sendy Loefstop – Cantica: Mi Ta Cla ...

Segun Benny Sevinger: Presupuesto di infrastructura no tin proyectonan nobo

ORANJESTAD – Durante e siman aki cu Parlamento ta tratando e diferente presupuesto di ...

15reaccion (JO) (3).JPG

Aña electoral ta na caminda anto gobierno no a traha un base

Gobierno a presenta su plan di maneho pa proximo aña den locual a toca ...

Minister: no ta aproba peticion pa construi hotel na Isla di Oro’

Recientemente minister Otmar Oduber(POR) a haci peticion pa ricibi conseho di departamento Directie Natuur ...