Aunke negociacion ta tumando luga keto bay, pero ainda no tin un operador oficial pa ex Aura Casino situa den Barceló Hotel (ex Occidental Hotel).
Mediador di Gobierno sr. Anselmo Pontilius a intermedia den e situacion aki cu a surgi despues cu operador anterior no por a sigui carga su compromiso y responsabilidad lagando alrededor di 44 trahado di casino sin trabou y sin salario.
E echo cu e grupo interesa pa opera e casino aki tin su base na Merca, oficina di Mediador di Gobierno a insisti y minister di Labor a manda un carta pa invita nan pa bin Aruba personalmente. Nan ta convenci cu si e directiva di e grupo aki lo bin Aruba e siman aki, eventualmente e partinan envolvi lo por yega na un acuerdo.
Reunion y situacion
Mediador di Gobierno a laga sa cu lo tin un operador oficial na momento cu nan lo firma un acuerdo cu gerencia di e hotel. Sr. Pontilius a sinta den varios reunion cu e grupo cu e hotel a selecta como potencial candidato pa opera e casino. Den e reunionnan aki a participa gerencia di e hotel, tambe abogado, sr. Delo Gomez kende ta representa e grupo cu ta uno internacional cu experiencia den mundo di casino, y tambe representante di sindicato di e trahado, esta FTA.
E operador interesa den e maneho di ex Aura Casino a duna un indicacion cu nan no por tuma tur e 44 trahadonan. Nan ta argumenta cu pa motibo cu espacio di e casino ta bira mas chikito nan mester reduci e personal. Segun sr. Pontilius tambe tin un diferencia “fuerte” riba e salario retroactivo.
Sr. Pontilius a splica cu ley laboral a cambia y e operado nobo cu ta drenta tin cu asumi e responsabilidad di tur e condicion di trabou di e empleadonan, inclusivo nan salario.
“E ta un situacion hopi penoso cu e trahadonan ta aden. E no ta un situacion facil pasobra no tin niun vehiculo legal cu por obliga hotel of e posibel operador ki dia e ta habri”, segun Mediador di Gobierno. Den e reunionnan caminda tur parti envolvi a participa por a mira si nan lo por supera nan diferencia y cu por yega na un acuerdo.
