Director di SVGA ta haya cu accion di FTA ta descabeya

accion SVGA

 Director di Stichting voor Verstandelijk Gehandicapten Aruba (SVGA), sr. Arturo “Tuyo” Werleman a lamenta e accion di protesta cu e trahadonan a realisa ayera mainta.

Den declaracion na Bon Dia Aruba, sr. Werleman a bisa cu e ta spera cu accionnan no lo sigui. “Mi ta spera cu sano huicio lo prevalece den e caso aki”, el a bisa.  

Sr. Werleman a bisa pakico presidente di FTA no a entabla e caso cu e sindicato a anuncia enbes di perhudica e clientenan. “Pakico bo a haci daño na e cuido, pakico bo a haci daño na SVGA, pakico bo a haci daño na Aruba cu un accion descabeya asina aki”, el a bisa.
Aunke e accion di protesta tabata programa pa dos ora y ya pa 10’or di mainta e personal mester reanuda na trabou, sr. Werleman a bisa cu esaki no tabata posibel. El a splica cu e fundacion ta uza busnan particular cu nan ta huur pa dos ora pa busca nan clientenan rond Aruba. Nan ta busca nan mainta y baha nan den nan centro di cuido, y merdia nan ta bin bek. Y na momento cu e accion a presenta e busnan no por a sali mas.
Accion
E kier a pidi disculpa na e mayornan pa e situacion cu a surgi ayera mainta. “E mayornan sa cu nos ta un fundacion serio y cu nos lo nunca laga nan na caya perhudica nan di e manera aki. Pero e no tabata den nos man…”, el a bisa.
Sr. Werleman a declara cu e accion di protesta aki tabata un sorpresa pa nan, y el a cualifica como un “accion descabeya di FTA”.
Segun director di SVGA, el a wordo informa dor di un hefe di departamento di e fundacion cu e trahadonan ta para pafo, mientras cu di dos departamento (departamento di mucha chikito y departamento di adulto), tur nan trahadonan ta para pafo cu excepcion di e hefe di departamento.
E ta lamenta cu nan no por a yama e mayornan mainta tempran riba e accion aki, ya cu sigur esaki a trece problema pa e famia di e cliente cu eventualmente mester bay trabou, etc… y nan no a haya chens pa busca un solucion pa su yiu cu tin limitacion.  “Ami ta considera esey un trapamento di derecho di e personanan cu limitacion dor di FTA su dirigentenan”, el a bisa.

Lesa aki e banda di FTA.
Lesa tambe e director su comentario cu SVGA no tin placa

 

 

You May Also Like

image.jpeg

Fitch Ratings: Reapertura refineria ta nifiica crecemento economico pa Aruba

Agencia di evaluacion finaiciero-economico FitchRatings ta reafirma e rating di Aruba cu un perspectiva stabiel diabierna ultimo. Banda di esaki, e agencia ta ...

Despues di 40 aña: Stichting Geestelijke Gezondheidszorg

Recientemente Minister dr. Carlos Alex Schwengle conhuntamente cu AZV y notario a firma e ...

Inversion di 280 miyon rekeri pa drecha scolnan

Minister di Enseñansa ta admiti cu e lista di scolnan pa drecha ta relativamente ...

Minister Oduber y KvK a elabora riba desaroyo ROP

E comision di ROP di Camara di Comercio y Industria di Aruba (KvK) a ...