Bida di trahadonan di biblioteca cu problema di presion halto ta na peliger

Ayera e accion di e trahadonan di Biblioteca Nacional a sigui den su localidad di Playa. Pero e biaha aki no solamente tabatin presencia di SEPPA  sino di sindicato TOPA tambe,  y mayoria di e trahadonan a uni na e accion di protesta aki.

Fei dialuna e trahadonan di Biblioteca Nacional a dicidi di pone trabou abao pa problema di mal funcionamento di e sistema di airco den e departamento aki.  Fei un luna pasa nan sistema di airco a cuminsa presenta problema y e no tabata traha optimalmente, y awor e situacion a bira pio, teniendo na cuenta tambe e calor pisa di e dianan aki.

SEPPA
Sheila Werleman kende ta schopsteward di SEPPA a bisa cu nan ta continua cu e accion aki te ora cu minister di Enseñansa, Sra. Michelle Winklaar ta sinta cu nan.

Nan ta haya cu e prome stap ta esun di reuni prome pa evalua un solucion pronto. Un solucion pronto kiermen si nan ta wordo re ubica un caminda. Of kico ta bay pasa pa atende cu e problema di airco pa nan por traha den un miho ambiente. Aunke nan a pidi pa e mandatario sinta cu nan, te ainda nan no a haya contesta pa nan solicitud.

E problema di airco ta specificamente den biblioteca di Playa; pero na biblioteca di San Nicolas tambe tin problema entre nan di ubicacion y renobacion.  

TOPA
Mientras un representante di TOPA, Shardine Croes-Tromp a vocifera e disgusto di e trahadonan ya cu e problema cu e airco ta bin andando fei di basta dia caba.  Nan a purba di traha di mainta te cu merdia y ora e calor tabata bira mas pisa nan tabata subi den cantina caminda si tabatin airco.

Sra. Croes-Tromp a bisa cu e problema cu airco no ta uno nobo. “Semper nos tin problema cu airco akinan y te cu awe nos no a haya un carta di minister pa tene reunion cu nos”, el a bisa.

Di otro banda e delegado di TOPA a argumenta cu no ta cuestion cu nan no tin gana di traha, pero e ta bay cu e calor ta insoportabel den biblioteca. Ademas nan tin un grupo di trahadonan di biblioteca cu ta sufri di presion halto y nan no kier pone nan bida na peliger.

Nan tin comprension pa e clientenan cu ta bishita e biblioteca, pero e calor ta pisa paden di e edificio. “E ta insoportabel! No tin bentana, no tin nada cu por habri pa aire por pasa”,  delegado di SEPPA a declara.

Tambe el a bisa cu no ta den man di e trahadonan pa pone e luga cera ya cu nan ta pidiendo un solucion. “Nos kier pa solucion. Nos no kier sinta afo tampoco”, el a bisa.