Sindicatonan lo haci apelacion ariba caya

Union Sindical di Aruba cu a wordo forma aña pasa despues cu Dialogo Social no a sigui lo mantene un posicion firme riba un lista di puntonan di atencion cu nan ta trahando pa Gobierno tene cuenta cu nan. USA ta forma  pa 10 sindicato di e 14 cu tin na Aruba, nan ta SEPPA, STT,UEA,IOWA,SCCA,SIMAR, SADA, ABV,SIWA y FTA.

Presidente di FTA, sr. Hubert Dirksz a  declara na Bon Dia   Aruba cu si nan no ta yega na comprondemento y solucion na mesa “nos ta kere cu nos mester pone e presion pa haya e atencion y respet”. El a indica  cu si e situacion aki no ta yega asina leu di haya cu e responsabilidad di gobierno no ta wordo cumpli nos lo haci apelacion ariba caya.

Igualmente el a laga sa cu nan ta apela na e responsabilidad di gobierno, politiconan pa atende cu nan problemanan manera mester ta.  “Y no opta pa soluciona e problema na e antoho di e politico”.

Consecuencia pa nos pais

E lider sindical di FTA tabata categorico pa manda su mensahe bisando: “No tuma e fruta dushi y for di macutu, anto laga e fruta zuur”.  E kiermen cu pa nan no beneficia exclusivamente politicamente sin importa e consecuencia pa nos pais.

E sindicalista Dirksz ta kere cu si nan no por yega na un compromiso na mesa cu esunnan concerni, e ora ey nan como sindicato lo haci un apelacion pero riba caya. “Nos ta spera, considerando cu nos ta kere den dialogo, cu riba caya no ta e prome luga, pero nos ta exigi un respet pa e dialogo”. 

E ta agrega cu nan kier un gobierno cu ta tene cuenta cu na momento di tumamento di  decision dificil of facil, e dialogo y e partnernan ta wordo balora mesun cos. “No na momento – segun presidente di FTA- cu gobierno ta den un situacion politico pa tuma un decision impopular, e ta laga e sindicatonan cay”.