(NLTimes) – Dirk Reynders a renuncia como director di Amsterdam Fashion Institute (AMFI), cual ta Amsterdam su instituto di moda despues di a ricibi critica pa su comportamento y acusacion di studiantenan cu el a crea un ambiente y cultura “toxico” na e scol.
Den un carta dirigi na e empleadonan di e instituto di moda, el a bisa cu e no ta considera su persona esun mas adecua pa haci AMFI un luga sigur pa siña, RTL Nieuws a reporta.
“Mi a ripara cu mi motivacionnan personal y cualidadnan ta den aspectonan sustantivo di educacion, investigacion y moda,” Reynders a skirbi. “Pa e motibonan aki mi a bini na e bunita instituto di moda AMFI. Pero algo otro ta e necesidad actualmente.”
Den mei, AMFI su studiantenan a demanda Reynders renuncia su posicion como director, apoya pa union di studiante di Amsterdam ASVA. Studiantenan a conta RTL Nieuws cu e ambiente na e scol di moda tabata uno hopi toxico. Nan a bisa cu e docentenan y conferencistanan tabata kibra nan fisicamente y mentalmente, y regularmente nan tabata laga nan na berguensa publicamente durante presentacion y evaluacion. Nan kehonan tocante e situacion a ser ignora.
Un estudio conduci pa e agencia Bezemer & Schubad a conclui cu AMFI no ta un espacio cu un ambiente sano pa studiantenan ni empleadonan.
