E aña aki temporada di Pasco a cuminsa mas tempran. Un temporada yen di alegria y spiritualidad, pero tambe un temporada di hopi comemento.

Aunke seguramente e aña aki lo ta uno otro na esunnan tradicional debi na e pandemia di Covid cu ta exigi di nos distanciamento social. Sinembargo ta necesario sa kico pa haci y asina evita e kilonan di mas cu mayoria di hende ta subi durante epoca aki.

Aunke epoca di Pasco y Aña Nobo no ta e miho tempo pa cuminsa dieet, e comemento di mas durante e dianan aki ta cobra un prijs masha halto mes. Subimento di peso como consecuencia di comemento exahera den e dianan aki ta un realidad pa mayoria hende.

Ken a bisa cu un persona no por come sano y mantene curpa sano den Pasco? Bon Dia Salud ta duna bo algun di conseho pa nos disfruta nos dianan resposablemente

-Aumenta e consumo di fruta y berdura, esaki lo pone mas fibra den bo dieta diario. Come salada, no pasobra nos ta den Pasco y aña nobo nos mester priva nos mes di e beneficionan asina grandi di e berdura

-Ora bo ta wordo invita pa fiesta unda tin catering, purba sinta lehos di e buffet, asina e tentacion ta menos. Si bo mester bay busca cuminda, por lo menos bo mester cana un tiki.

– Percura come di manera balansa, kiermen cuminda di tur grupo: fruta, berdura, aros, bonchi, pasta, carni y productonan di lechi. Uza un tayo chikito, come porcion nan chikito di diferente cuminda y no hopi di un sorto so. Evita manteca y salsa di crema den recetanan di Pasco. Uza manteca no satura manera zeta di oleif . Kita e vet di e cuminda, prome cu bo hinca e turkey den e forno, kita e cuero, cu ta loke tin mas vet.

– Usa e forno mas frecuente cu cuminda hasa den zeta

-Purba bebe mas awa of green te enbes di refresco of bebidanan dushi

– Cambia carni cora pa pisca y hariña integral en bes di hariña blanco

– Tocante e dessert: Si bo ta sinti yen y satisfecho, no come dessert. Bo no mester obliga bo mes pa come y despues sinti remordemento. Si toch bo kier purba algo dushi un tayo di fruta corta pida pida, fruta mix, friu di awa no ijscream, ta bon alternativa pa poco caloria. Mescos cu mouse prepara cu e blanco di webo, sucu di dieet y fruta machica ta ideal

– Consumi alcohol cu moderacion, no solamente pasobra ta sigur pa bo y bo famia ora di stuur, pero tambe pasobra alcohol tin hopi caloria. E cantidad ideal di alcohol pa hente homber y muhe: dos biña pa dia.

Disfruta e momento: Ta berdad cu un parti principal di e reunion di Pasco y fin di aña ta e cuminda y bebida, pero e biaha aki purba comparti mas cu bo ser stima, esta famia y amigonan. P’esey ta importante pa focus riba e spirito di e evento y no solamente riba cuminda, specialmente e aña aki cu a trece hopi reto pa henter humanidad.

LEAVE A REPLY

Please enter your comment!
Please enter your name here