Division entre doñonan di cas y desaroyador tocante progreso di proyecto di vivienda Jewel Residences

Un grupo di ciudadano cu ta propietario di algun cas den e desaroyo di vivienda Jewel Residences a tuma contacto cu Bon Dia Aruba pa a expresa nan preocupacionnan y a comparti nan frustracion pa motibo di retraso, tension financiero y retonan di comunicacion. Na mesun momento, e desaroyador di e proyecto, Able Realty, a splica na Bon Dia Aruba cu construccion di e casnan ta keda dentro di e liñanan di tempo contractual y cu no tin ningun cos robes tumando lugar.

E situacion ta refleha un division creciente entre varios cliente – kendenan a pidi pa keda anonimo – cu ta describi dificultadnan y incertidumbre continuo, y e posicion di e desaroyador di e proyecto, kende a informa cu e proyecto ta progresando segun terminonan acorda den.

Varios di e doñonan di cas envolvi den e proyecto a expresa malcontento, describiendo loke nan ta caracterisa como asuntonan generalisa cu ta afecta progreso di construccion. Un ciudadano a declara cu e preocupacionnan ta bay mas leu cu incidentenan isola, señalando cu “hopi famia” a ser impacta den e situacion aki. Di ciudadano cu e individuo aki, clientenan cu a cera contract y a haci pagonan —hopi biaha financia a traves di fiansa di banco—a topa cu retraso y inconsistencianan ripiti.

E ciudadanonan, como tambe varios otro di e doñonan di cas, a alega cu fondonan paga pa fasenan specifico di construccion no semper ta ser usa directamente pa nan proposito. En bes di esey, el a indica, e fondonan aki por ta ser redirigi pa otro cas of gastonan, creando un ciclo den cual progreso riba un cas ta depende di pagonan haci pa otro clientenan. E mesun ciudadano tambe a lanta preocupacion tocante un falta di transparencia financiero, bisando cu clientenan tin tiki visibilidad den con nan pagonan ta ser maneha unabes transferi.

E ciudadanonan a lanta preocupacionnan adicional tocante e adkisicion di materialnan di construccion. Segun otro ciudadano, materialnan no ta ser cumpra semper na tempo of di acuerdo cu specificacionnan di e contract, loke ta contribui mas ainda na retraso. E doño di cas tambe a describi problemanan di comunicacion, alegando cu algun cliente a experiencia confrontacionnan verbal y falta di respet ora di busca informacion.

E preocupacionnan aki ta ser ripiti pa otro doñonan di cas. Un di e doñonan a describi un liña di tempo cu nan a bisa ta ilustra e retrasonan. Di acuerdo cune, el a haci un pago inicial na april 2022, pero construccion di nan cas no a cuminsa te cu november 2025. E contractnan a keda finalisa na un notario na juni 2025 despues di loke nan a describi como un periodo di espera prolonga.

E retrasonan, e doño di cas a bisa, a crea presion financiero, ya cu tin individuo cu mester paga tanto huur como hipoteca. El a indica cu tin mester a pidi prolongacion di nan banco, cual por resulta den gastonan adicional calcula na alrededor di 10.000 florin Arubiano na interes. E doño di cas a indica cu e peso financiero aki tabata directamente mara na e retraso den construccion.

Ademas di preocupacionnan financiero, e mesun individuo a describi retonan den comunicacion. Nan a afirma cu intentonan pa tuma contacto cu representantenan pa informacion tin biaha tabata ser haya cu contesta negativo, incluyendo insultonan verbal. Esaki, el a indica, a haci’e dificil pa mantene un relacion constructivo cu esnan cu ta supervisa e proyecto.

Un otro participante den e proyecto a duna un perspectiva mas amplio riba e liña di tempo di e desaroyo. Di acuerdo cu e ciudadano aki, e proyecto ta data for di alrededor di 2020 y inicialmente a experiencia retrasonan debi na asuntonan relaciona cu permiso. Mientras cu el a enfatisa cu e retrasonan trempan ey tabata comprendibel, el a indica cu e preocupacionnan a crece despues cu construccion a cuminsa y a baha significantemente despues.

E ciudadano a describi un periodo durante cual progreso visibel tabata ser haci riba varios cas, sigui pa un bahada alrededor di october aña pasa. Desde e tempo ey, el a enfatisa, hopi cliente a observa actividad limita riba nan propiedadnan. Splicacionnan ripiti cu ta cita scarsedad di material di construccion a ser ricibi cu skepticismo door di algun doño di cas, cu a informa di a tuma contacto cu proveedornan di material directamente y a ser bisa cu materialnan tabata disponibel y no a ser pidi.

E discrepancia aki a contribui na preocupacionnan tocante si recursonan ta ser aloca manera mester ta. E mesun doño di cas a sugeri cu ta parce cu tin un patronchi den cual fondonan di pagonan nobo ta ser usa pa avansa otro casnan, creando retraso den varios proyecto.

E ciudadanonan a subraya asuntonan relaciona cu labor tambe. Di acuerdo cu nan, contratista y trahadornan ta ser reemplasa frecuentemente, y algun ta bay debi na pagonan retrasa. Esaki, nan a bisa, ta stroba continuidad riba terenonan di construccion y ta contribui na progreso inconsistente.

E impacto financiero riba doñonan di cas tabata un punto di preocupacion pa varios di nan. Varios cliente a indica cu nan ta manehando obligacionnan financiero dobel actualmente, pagando tanto huur como hipoteca mientras nan ta warda pa nan casnan keda cla.

Mientras cu doñonan di cas ta describi frustracion y preocupacion, Able Realty a presenta su propio perspectiva, enfatisando cu proyectonan di construccion ta someti na multiple variabel y cu e liñanan di tempo mester ser considera den e contexto di acuerdonan contractual.

Segun e desaroyador a splica, planificacion pa e proyecto Jewel Residences a cuminsa durante pandemia di COVID-19, un periodo cu a afecta procesonan administrativo significantemente. E compania a declara cu obtene e Ministeriele Beschikking (MB) a tuma aproximadamente dos aña y ocho luna, na loke nan ta atribui e retraso mas grandi. Despues di esey e proceso pa akte di notario y permiso di construccion necesario tambe a tuma su tempo, cual tambe ta fuera di nan control.

Able Realty a splica cu prome cu construccion por cuminsa, e clientenan mester pasa den varios paso, entre otro consulta cu arkitectonan, sigura financiamento cu banconan, y coordina cu entidadnan gubernamental manera DOW y DIP. E compania a señala cu e procesonan aki por varia di cliente pa cliente y por influencia liñanan di tempo individual.

Pa loke ta trata e liñanan di tempo di construccion, Able Realty a declara cu e contractnan ta specifica un periodo di finalisacion di 270 di trabou (werkbare werkdagen) unabes cu construccion cuminsa. E compania ta sostene cu tur proyecto ta progresando dentro di e terminonan contractual aki y cu e situacion di cada cliente por ta diferente a base di areglonan di financiamento y otro factornan.

E desaroyador a mustra tambe riba factornan externo cu por afecta construccion, entre otro condicionnan di clima, particularmente periodonan di awasero pisa, por retrasa trabao, mientras cu dianan di fiesta y periodonan di fin di aña tambe por frena actividad. Ademas, adkisicion di material ta rekeri planificacion di antemano y por ser afecta pa retonan di e cadena di suministro.

Un otro factor cu e desaroyador a subraya ta modificacionnan pidi pa e cliente. Able Realty a declara cu cambionan den diseño of specificacionnan despues cu construccion a cuminsa por conduci na retraso, ya cu mester haci ahustenan pa acomoda e peticionnan aki.

Como contesta riba critica, e compania a reconoce cu no ta tur cliente por tin e mesun experiencia pero a declara cu hopi ta satisfecho cu e progreso di nan cas. Able Realty a enfatisa cu su enfoke ta keda riba finalisacion di e casnan y entrega den e terminonan acorda.

Tambe e desaroyador a señala cu su proyectonan ta dirigi riba atende e necesidadnan di vivienda pa habitantenan local, describiendo e situacion di vivienda na Aruba como un reto. Na mesun momento, e compania a expresa preocupacion tocante e impacto di reaccionnan negativo riba medionan social, yamando esaki desalentador.

E situacion rond di Jewel Residences ta refleha e realidad mas amplio cu proyectonan di construccion hopi biaha ta ser influencia pa factornan fuera di e control directo di desaroyadornan. Retrasonan administrativo, condicionnan di clima, retonan di cadena di suministro, y coordinacion cu institutonan financiero y instancianan gubernamental tur por afecta e liñanan di tempo, sin importa e planificacion inicial.

Mientras cu e factornan aki no ta disminui e preocupacionnan cu doñonan di cas ta trece dilanti, nan ta subraya e complehidad di desaroyonan di vivienda na gran escala, particularmente den un mercado chikito y altamente regula manera Aruba.