Den e edicion aki un articulo amplio tocante e conseho cu Raad van Advies a duna pa Aruba haya un mihor perspectiva den e proximo añanan. Mientras nos tin miedo cu e ‘conseho’ aki tambe lo haya e destino cu tur e otro consehonan cu e organismo aki y otronan a yega di duna, a haya, e conseho ta util pa esnan cu ta tuma e molester pa lesa esaki.

Lamentablemente e grupo cu ta bay haci esey, y mihor ainda, ta discuti esaki cu otronan, ta demasiado chikito. Esaki ta e momentonan cu bo por ripara cu e alcance di tipo di conseho aki ta keda limita y no ta haya su caminda pa un publico mas grandi. Por ta cu nos mester bira mas creativo y busca forma pa comparti e conocimento aki y trece mas ‘den pueblo’ y no laga esaki pa esnan cu sa bon Hulandes. Talvez un sugerencia pa gremionan empresarial y sindicatonan pa trece esaki bao di nan miembronan?

En todo caso, nos ta desea di atende algun punto cu nos a haya interesante den e conseho y cu merece un comentario balanza. Un di e puntonan importante ta e integracion di maneho riba diferente tereno cu ta sensato, cu por yuda fortifica otro envez cu nan ta contradictorio y contraproducente. Como ehemplo e sincronisacion y acoplacion cu mester bin riba tereno di medio ambiente, desaroyo teritorial y construccion, tambe di vivienda. Ta referi na e manera con den e teritorionan Hulandes den Caribe cu ta cay bao di gobernacion Hulandes a haci un intento pa acopla e terenonan aki. Esey riba su mes ta un bon idea y lo mester mira den ki sentido e pensamento aki ta reconocible den e actual ley di ROP na Aruba. Sin embargo, manera den tanto otro asunto, aki tambe no ta intencion y plan ta spanta hende, sino e ehecucion. Nos ta kere cu hopi di nos leynan actual riba papel no ta mustra asina malo, pero e pregunta ta kico bo ta bay haci cunan. Y ta aki, ora bay den e detayenan, nos ta topa cu e problemanan berdadero, cu den e ambiente politiza ta dificil pa discuti cu cabez friu. E problema fundamental ta cu den nos gobernacion ainda ta reina e idea cu goberna ta significa traha ley, si ta conveni, y si no ta conveni no ta traha ley. Ora bo tin ley bo por opta pa implementa nan, si ta conveni, y si no ta conveni, no ta implementa. Realmente nos tin un aparato gubernamental cu ta basa riba e principio aki di ‘conveniencia’ y no riba un aplicacion equitativo y eficiente di ley. Esey ta haci cu leynan cu no tin prioridad, pa e gobierno di turno, no ta haya recurso pa implementacion di e ley, asina simple. Di e mesun manera aki tambe ta trata partinan di gobernacion cu no tin prioridad, manera e propio Raad van Advies y otro organonan di control cu ta superimportante pa un funcionamento adecua di un sistema democratico, cu mester lucha pa nan haya e recursonan financiero y humano pa nan por haci nan trabao. Awor, si bo puntra un politico directamente kico e ta pensa di esaki, lo mas probable ta cu e ta hura bo cu naturalmente esey ta sumamente importante y cu e entidadnan aki mester haya financiamento adecua. Pero manera semper, aki tambe ta aplicable e expresion “entre lo dicho y lo hecho, hay mucho trecho’. Ta den e practica di tur dia ta mira e casi sabotahe cu ta tuma lugar cu ta haci cu bon gobernacion ta bira un ilusion.

Pero, bolbiendo na e area unda nos a cuminza, ta importante reconoce cu no ta cuestion di elabora e leynan necesario, sino con pa unifica trabao gubernamental cu den hopi aspecto tabata y ta deficiente. Si ta un tarea dificil caba pa acopla trabao gubernamental cu cada un separadamente ta funciona bon, pero purba unifica organisacionnan cu no ta funciona ta un dolor di cabez casi insuperable. Si nos djis tira un vista riba e proyectonan di reorganisacion cu a tuma lugar den e aparato publico durante e ultimo decadanan lo ta dificil pa indica algun exito.

Y aki nos ta toca otro punto cu Raad van Advies tambe ta atende, y esey ta e mehoracion di e procesonan gubernamental, specificamente esunnan di permiso. Aki nos ta haya cu ta expresa demasiado facil e speranza cu digitalisacion lo trece cambio positivo. Den e sentido ey nos ta mas pesimista, pasobra riba su mes digitalisacion no ta bay mehora mentalidad di hende, y sigur no den un cultura di negativismo, di mira e ciudadano como e ‘fastioso cu ta bin molestia’ na oficina di gobierno. Y no ta un problema primeramente di e personal, sino di e estilo di management deficiente cu ta reina ainda den hopi – no tur – departamento. Y tanten cu no ta bolter e modelo cu ta maneha, unda interesnan politico di e gobierno di turno ta dicta prioridad di un departamento, nos lo ta invirtiendo hopi placa, sin speranza di mehoracion. Tur e temanan cu Raad van Advies a toca, a yega di bin dilanti multiple biaha. Nos ta na 2020 y esnan cu conoce e practica gubernamental di ultimo tres decada sa con poco cos a cambia.

 

LEAVE A REPLY

Please enter your comment!
Please enter your name here