(NLTimes) – 3 kwart di empleadonan di educacion ta contra e intencion di haci e periodo di vakantie grandi mas cortico, union di educacion general AOb a reporta basa riba un encuesta entre nan miembronan.
Gabinete di Hulanda ta considerando organisa e vakantie grandi diferente en bista di un posibel ola di coronavirus.
Si e vakantie grandi ta un siman mas cortico, por extende e vakantie di fin di aña cu un siman. Muchanan ta perde menos dia di scol si coronavirus, cual ta circula mas lihe den temporada friu, bolbe plama. Organisa vakantie diferente ta un di e medidanan cu e Gabinete ta considerando si un variante nobo y mas peligroso di coronavirus surgi.
Sinembargo empleadonan di educacion no ta kere cu esaki ta un bon plan, segun AOb. Mas o menos 22,000 miembro di e union a completa e encuesta. Solamente 16 porciento a vota na fabor di e cambio aki. AOb su director Tamara van Gelder ta yama esaki “trabao na mita.” Segun su persona, e virus por ser para mas efectivamente den scolnan cu otro medidanan manera miho ventilacion den klas. Segun e union, docentenan tambe mester tin prioridad si vacuna contra coronavirus bira necesario un biaha mas.
Si Gabinete dicidi di extende e vakantie di fin di aña, solamente mita di e miembronan di AOb ta di acuerdo pa esaki ser kita for di vakantie grandi. Otronan, kier pa esaki ser kita di otro vakantienan durante e aña.
Gabinete a anuncia riba diahuebs cu nan tin intencion di parcialmente cera scol primario y secundario si den algun momento coronavirus bolbe plama. Sinembargo, medidanan manera limita contacto y test regular lo bira necesario. Gobierno lo anuncia mas detaye di su plannan mas adelante prome cu e temporada caluroso cuminsa.
