(Newsweek) – Oficialnan di FBI a revela un documento di dies pagina conteniendo cartanan di publico suplicando pa mas investigacion riba e morto di Kurt Cobain, cabesante di e banda Nirvana.

E tres corespondencia – fecha 1997, 2003 y 2006 – ta cita documentarionan di television y bukinan riba morto di e cantante, cu a fayece di suicidio cu edad di 27 aña, dia 5 di april 1994.

Un carta – manda na sede di FBI na Washington, D.C., y marca dia 20 di november 2006 – a bisa cu polis tabata demasiado pura pa cera e investigacion. “Esaki ta molestia mi mas cu tur cos pasobra su asesino ainda ta eyfo y awo, pa motibo di e pura di departamento di polis, tin chance pa cobra otro victimanan”, e ta bisa.

Un carta manda na 2003 na e division di FBI na Seattle, unda Nirvana tabatin un rol mayor den escena grunge cu a revoluciona cultura alternativo di inicio di añanan 1990, a haci un yamado pa ‘un reexaminacion di morto di Sr. Cobain’. “Miyones di fanatico rond mundo lo kier mira resolucion di tur e inconsistencianan rond di e morto pa caba”, el a bisa. “Ta tristo pa pensa cu un inhusticia di e naturalesa aki por ta permiti na Merca.”

Otro carta separa, manda na unidad di asesinato di polis di Seattle na 1997, ta cita declaracionnan di investigador priva Tom Grant, contrata pa esposa di Cobain, cantante di Hole, Courtney Love, despues di desaparicion di Cobain alrededor di e tempo di su morto.

Grant a lansa su propio documentario na 2005 riba morto di Cobain.

E revelacion di FBI tambe a inclui e respuestanan di oficialnan di FBI na e corespondencia, cu oficialnan destacando cu mayoria di investigacion di morto generalmente ta cay bao hurisdiccion di agencianan local of estatal di cumplimento di ley. “Basa riba e informacion cu bo a provee, nos no a logra identifica ningun violacion di ley federal dentro di e hurisdiccion investigativo di FBI”, e respuestanan tabata bisa.

E documento riba Cobain a keda revela luna pasa na ‘The Vault’, e biblioteca di FBI di Ley di Libertad di Informacion. A yega sin aviso previo, y casi 27 aña despues di morto di e cantante.

Potretnan di polis mustrando e escena di morto di Cobain, mientras tanto, nunca ta spera di bira publico despues di un veredicto di corte na 2015 cu a keda sosteni na 2018.

Viuda di Cobain, Love, y yiu muhe di e pareha, Frances Bean Cobain, a gana nan bataya pa preveni revelacion di e potretnan ‘grafico y perturbante’ despues di un apelacion di periodista Richard Lee.

Cobain a forma Nirvana na 1987 na Aberdeen, Washington, cu Krist Novoselic den bass. E banda a lansa nan album debut Bleach na 1989, cu drummer Chad Channing.

Na 1990, e futuro Foo Fighter, Dave Gorhl a join e banda riba drum prome cu a graba nan vanguardista popular, Nevermind. E album, contando cu clasiconan manera ‘In Bloom’, ‘Come As You Are’, y nan cantica signatura, ‘Smells Like Teen Spirit’, a lansa e grupo como un superstrea.

Tercer album di e banda, In Utero, a ser lansa na september 1993, cu a conta cu e hitnan ‘Heart-Shaped Box’ y ‘All Apologies’. Na november di e mesun aña, Nirvanan a graba un set acustico pa MTV Unplugged.

Fanaticonan di Grunge y Nirvana a conmemora loke lo a ta Cobain su di 53 cumpleaños na februari di e aña aki.