Brigada di Hunta di Bombero Boluntario Dominicano na San Nicolas ta un organisacion di boluntarionan cu ta bin dunando su contribucion pa bienestar di nos comunidad.
Regularmente e brigada aki ta canalisa ayudo na instancianan y fundacionnan cu mester di dje, entre nan nos casnan di anciano. Den cuadro di esaki, nan a hiba algun donacion na cas di anciano Amada Plus 60 na Congoweg, San Nicolas.
Comandante di e brigada, Rolando Wilson a bisa na Bon Dia Aruba cu e donacion aki tabata posibel danki na Hyatt Resort su departamento di Recurso Humano cu a contribui cu algun clechinan. Nan ta preparando otro donacion pa otro cas di anciano na Playa. Tambe nan tin programa varios accion di limpiesa entre nan na Baby Beach.
Na luna di september di aña 2022, e brigada aki ta celebra su 10 aña di existencia. Ya caba nan ta trahando pa organisa un bunita actividad. Nan lo trece e banda di musica di e cuerpo di bombero di San Pedro de Macori y un coro cristian. Pa tal motibo dia 8 di maart cu ta Dia di Bombero, nan lo organisa un benta di cuminda Dominicano. Despues nan lo bini cu mas informacion riba nan actividad pa colecta fondo.
