Manera a bin informando for di luna di december di aña pasa, Adviescommissie Geneesmiddelenlijst Aruba (AGA) cu ta e comision cu ta traha cu e lista positivo di remedi cu ta wordo ehecuta door di AZV a tuma cierto decisionnan cu lo drenta na vigor mañan 1 di april.

Segun Solange Tchong di AZV a menciona, mundo medico ta wordo desaroya constantemente y pa añanan caba AGA tabata conseha minister tocante cierto cambio di loke tin di haber cu desaroyo den area aki.

Loke ta bay sucede ta cu nan a duna un periodo transitorio di cuatro luna y esey lo tuma luga awor mañan na unda tur hende a wordo recomenda na luna di december, nan como AZV y AGA a recomenda pa tuma nota di algun cambionan cu ta bay tin di loke ta trata e lista di remedi cu ta wordo ehecuta door di AZV.

Entrante mañan 1 di april, ora un asegurado di AZV bay botica e lo wordo confronta cu remedinan cu aworaki nan lo por haya di un manera mas facil y cu no tin mester di receta pa esey y lo cay di loke ta wordo yama e categoria di cuido propio.

Asina mes, el a señala cu e persona por haya su mes den e situacion cu cierto remedinan no lo wordo cubri mas y e mesun persona tin cu cubri su gasto, el a menciona como por ehemplo, paracetamol of Dica.

E otro cambio mas grandi cu lo tuma luga ta cu personanan lo haya remedinan cu ta prescribi via receta di dokter pero cu tampoco lo wordo cubri door di AZV y pa cu esaki nan a publica un lista riba nan website www.azv.aw na unda ta duna e nomber di substancianan activo cu tampoco ta bay wordo cubri y eynan e persona por tuma nota di esey.

Tchong a comenta cu ta importante pa e remedinan cu ta prescribi via receta di dokter cu no ta cubri mas pa AZV cu esey botica lo por cobra e persona un tarifa pa asina e por haya e remedi.

Un otro cambio cu tambe lo tuma luga ta loke nan ta yama e remedinan ariba criterio loke ta nifica cu nan ta remedinan cu a cambia di categoria unda cu ta bao cierto condicionnan y e ta wordo receta y tambe bao cierto specialistanan “cierto dokternan so por receta esaki”, Tchong a anuncia.

El sigui splica cu den henter trayectorio di añanan aki, Aruba tin un lista positivo di remedi hopi amplio cu hasta te aworaki cu tur e cambio aki Aruba ta un isla den cierto sentido “hopi bendiciona” segun loke Tchong a expresa, pa motibo cu tin un maneho riba remedinan y e proceso di importacion, loke ta haci cu tur e cambio aki e asegurado di AZV lo wordo confronta cune y nan a percura pa cu te ainda tin un gran cantidad di remedinan pa loke ta tur e malesanan cu un pashent por haya.

Ademas, el a enfatisa cu ta importante pa e asegurado sa cu un gran cantidad di remedinan of cambio principal ta referi pa e grupo cu ta bira cuido propio y esaki no ta sosodiendo na Aruba so sino tambe na otro paisnan.

Tchong a bisa cu AZV ta recomenda tur hende pa tuma nota di e cambio aki cu ta bay cuminsa mañan y ta hopi importante pa busca informacion y haya si loke e tabata usa ainda e tin cu keda usa pa bay den conversacion cu su specialista y eventualmente hasta tabatin e opcion cu por a hasta busca un alternativa.

El a trece dilanti cu den cambio aki nan no ta sacando afo por ehemplo, inyeccionnan cu ta pa trata e malesa di cancer cu ta costa 500 florin of mas pa uno, akinan nan ta papia di cosnan chikito manera Tchong a sigura cu e persona mester responsabilisa su mes pa paga.

Manera el a menciona anteriormente, e cambio aki a wordo conversa y analisa durante añanan caba y nan a dicidi di implementa e cambio poco a poco, den e trayecto aki Tchong a declara cu no tabatin e cambionan aki sino cu tambe a bin acerca riba e lista di remedinan bao criterio y cu aworaki nan a amplia esey, nan lo a haci “un poco mas stricto” pa motibo cu esaki tin di haber cu e prescripcion di remedinan.

El a comenta cu loke nan kier ta pa maneha e uso di remedinan na Aruba mas miho y pa asina tin un miho control, cu ta un di e metanan cu AZV tin y ta haciendo esaki cu cierto cambionan cu ta pa e asegurado cu ta bisa cu no tin e placa of e manera financiero pa cumpra, pa di e manera aki comunica cu su dokter y puntra si e remedi ta necesario of por evalua na un otro alternativa.

“Nos ta pidi pa aseguradonan pa tin e paz mental cu en todo caso bo seguro AZV ta keda pa malesanan grandi, nos no ta papiando di cosnan chikito manera un verkoud” cu e persona mes por cuida y den un par di dia lo bira bon, e seguro AZV lo keda pa malesanan cronico of tratamentonan di radio terapia por ehemplo.

Asina mes, el a afirma cu nan ta compronde e parti na unda aseguradonan tin cu paga nan remedinan y pa cu esaki Tchong a manifesta cu na final di dia tur hende tin cu corda cu si ta pone como por ehemplo e pais bisiña Venezuela, “nos no kier pa nos yega na e situacion ey na unda no tin nada” y asina mes cu tur adaptacion cu a wordo haci no mester lubida cu ora AZV a cuminsa na aña 2001, e pakete cu e cual nan a cuminsa cune den bista di otro paisnan Aruba tin un pakete bastante amplio.

Den tur botica lo por bay wak tur e cambionan principal den un flyer na unda nan ta splica e categorianan di e cambionan y tambe ta bisa na unda mester busca mas informacion di esaki.

Aparte di tur e cambionan aki for di mañan pa loke ta trata remedinan, tambe lo tuma luga e cambio di botica na unda nan a referi pa personanan lo haci’e via e app di AZV pa motibo di digitalisacion di e departamento aki, asina mes pa esunnan cu no tin un telefon inteligente of no sa con pa usa e aplicacion aki nan ta recomenda pa comunica cu AZV.

El a sigura cu nan a yega na e cantidad di 46.000 asegurado cu ta usa e aplicacion di AZV pero e obhetivo ta mas hende por haci uso di dje.