Segun un relato oficial di DOW, despues di 2 dia y mei di esfuerso nonstop di staff di DOW, e trahadonan balente y su contratistanan a logra contene e diesel procedente di e incidente na hospital pa e no causa un desaster na habitat di Bubali Plas. “Mester bisa si cu esaki a rekeri hopi esfuerso di staff di maneho di DOW y cu apoyo di comision di calamidad.”

E relato ta sigui splica cu e comision tabata monitor e situacion continuamente  y tabata informa gobierno y demas stakeholders di e situacion. “Decisionnan clave a ser tuma y cu hopi cautela y precision a tuma e pasonan necesario pa logra e meta pa cu e diesel no yega den Bubali Plas. Diadomingo merdia despues di e analisis cu Directie Natuur & Milieu a haci tanto den Bubali Plas como den e planta di tratamento di awa residual, a conclui cu e nivel di oxigeno den e awa di Bubali Plas y tambe den e planta ta bon atrobe. Esey kiermeen cu por a bay over  pa trece awa cu bacteria activo for di planta di Parkietenbos pa jumpstart e proceso den e AeratieTank. Ora cu e proceso aki ta bou di control lo bolbe cuminsa manda awa pa bubali Plas.”

E relato ta termina bisando cu gerencia di DOW ta gradici tur instancianan cu a traha cu alma y cuerpo, overtime y bou di condicionnan tenso pa a realisa e trabou grandi aki cual a evita un desaster na e santuario di parha y pisca di Bubali Plas. “Un biaha mas DOW  ta gradici tur esunnan cu a yuda y ta sigura cu lo sigui monitor e proceso den e proximo simannan.”