Home Local DOW: ‘Nunca a destina area pabou di Welcome Plaza como parkeerplaats’

DOW: ‘Nunca a destina area pabou di Welcome Plaza como parkeerplaats’

348

DOW den un comunicado ta splica cu e area unda un conmocion a pasa envolviendo negoshantenan di kiosconan nobo na Welcome Plaza ‘semper tabata destina pa bira un area di recreacion’. E negoshantenan sinembargo no a haya ningun aviso cu lo bay cera e area aki.

 Manera por lesa den nos edicion di ayera, tabatin un situacion tenso pa un rato na Welcome Plaza unda autonan sa parkeer pabou di e kiosconan. Nos a papia cu algun di e negoshantenan cu a expresa nan comprendemento pa tuma accion di cera e area cu lo wordo destina pa un area di recreacion, pero ta haya cu Departamento di Obra Publico (DOW) por a ‘aunke sea manda un carta’. E negoshantenan no a haya ningun aviso cu lo bay destina e area aki pa otro cos.

“Ultimo tempo a tuma nota cu mas y mas persona ta haciendo uzo di e area pabou di Welcome Plaza, unda cu e tram ta lora, como un espacio pa para auto’, Marlon Croes director di DOW a splica den un relato. Pa proteha e area aki di hopi fluho pisa di autonan cu por causa daño particularmente na e ‘tram baan’, a tuma e decision pa cera e area aki.  Esaki considerando e inversionnan cu a wordo haci pa renoba e area unda turistanan di crucero ta haya prome impresion di nos isla. Pronto lo instala borchinan cu lo fungi como punto pa informa automobilistanan, segun sr. Croes a sigui splica.

E plannan traha ta encera cu den e circulo memey di e area unda e tram ta lora mester bin varios ‘solar trees’, formando asina un parke cu wifi y coriente, segun sr. Croes. ”E decision pa cera e area a bin despues cu a tuma nota di ekiponan pisa cu ta yega riba e tereno y pa no molestia e ‘tram baan’ mas. Tambe tin luznan chikito riba e tereno cu auto por trapa, ademas di e forma di parkeer auto cu ta sosodiendo na un forma desordena cu ta duna mahos bista den e area unda cu turistanan ta yega.”

E informacion aki ta cuadra tambe cu informacion cu polis a duna e negoshantenan, cu na varios ocasion polis mester a interveni pa move autonan cu tabata parkeer mucho cerca di e rails, asina impediendo e tram di por pasa.

Sinembargo keto bay e preocupacionnan di e negoshantenan di kiosco no ta wordo trata. Manera nos a publica ayera, hopi di e negoshantenan ta haya dificultad pa paga e huur halto di e kiosconan nobo pa via di benta di souvenir cu no ta bayendo mucho bon. Esaki mirando cu no mester a paga huur mientras tabata den e area temporario pabou di Arubus. Te na momentonan aki director di DOW no a reacciona riba e preocupacionnan di e integrantenan di e kiosconan.