Otro luna lo cuminsa cu trabaonan di construccion na crusada di Superfood pa reconstrui esaki den un rotonde. Esaki tabata un crusada cu ultimamente a ricibi hopi critica pa via di e peliger cu e ta causa na peatonnan.

Tin problema cu e luznan di trafico eybanda basta frecuente, anto ultimo tempo a surgi basta critica pa DOW haci algo cu e crusada aki. Mirando cu turistanan ta uza e crusada aki hopi pa cana for di areanan di hotel pa bay supermercadonan otro banda, anto e luznan di peaton cu nan mester primi pa por crusa sin peliger, simplemente no ta funciona pa basta tempo tampoco.

Green Corridor
Pa loke ta trata Green Corridor, DOW ta laga sa cu nan ta den nan ultimo fase unda cu CIC/Odinsa a haci un evaluacion siman pasa riba e brug situa na Spaans Lagoen pa determina den ki estado e brug ta.

Den transcurso di siman DOW lo bin cu mas informacion riba e evaluacionnan haci riba e brug segun nan ta laga sa via un comunicado. DOW ta informa cu tin hopi reunion tumando luga entre CIC/Odinsa y Contracting Authority(CA) pa asina por presenta un plan pa yega na un Availability Certificate.

Watty Vos Blvd y otro desaroyonan
DOW ta na altura riba e preocupacionnan cu tin pa locual ta proyecto Watty Vos Blvd cu e rotonde na Cumana. “Ta asina cu un compania di Hulanda yama Forteck a bin haci un estudio. Nan a midi e topografia pa asina determina kico ta e pasonan necesario cu mester tuma luga. Pa asina por garantisa e fluho di trafico.”

Ayera DOW a sinta cu gerencia di Mota & Engil pa trata e topico aki. Alabes mester menciona cu e caminda entre Bushiri y Free Zone ta den construccion anto e prome capa di asfalt a wordo poni caba entre Seroe Patrishi – Tanki Leendert, y Tanki Leendert – Ponton. Awor ta trahando riba e pidanan entre Bushiri – Caya di Pos.

Tambe DOW ta laga sa cu otro siman dialuna lo bay cera e caminda di Caya Punta Brabo pa asina asfalta esaki.

Permiso di construccion
Manera conoci, minister di Infrastructura, Otmar Oduber a bini cu un maneho nobo di ‘cero tolerancia’ riba construccionnan ilegal y uzo di espacio publico sin permiso. Awor e proceso pa haya un permiso di construccion ta lo siguiente: E persona mester check kico ta e destinacion of huurcontract, anto a base di esaki traha su mapa di loke e kier construi.

Ta entrega e peticion pa permiso di construccion na DOW, manera e mapa haya un aprobacion di DOW, e persona por cuminsa construi. Prome cu esey no ta permisibel. Depende di e destinacion y mapa e ta wordo manda Cuerpo di Bombero pa asina e wordo controla y despues e lo bolbe wordo manda DOW pa un ultimo control.