Departamento di Progreso Laboral, ta activamente ocupa cu registracion di no solamente vacatura, pero tambe di personanan cu ta buscando trabao y tin cu bista cu e lista aki ta birando dia pa dia mas grandi.
Vacaturanan
Richinel Stamper, vocero di DPL, a splica cu DPL tin dos cos ta haciendo, pa asina e futuro trahado por sa ki vacaturanan tin riba mercado, como tambe e sistema di busca trabao.
Tur diasabra, entre otro den e corant aki, un lista di vacatura ta wordo publica, pero, esey ta solamente ta conta pa personanan local, esta naci na Aruba cu un identificacion Arubiano, pa e proximo 4 simannan (un luna) cu ta bin. E lista di vacaturanan aki ta conta pa esnan cu ta solicita pa funcionnan basico te na esunnan di mas halto.
Esey ta sigur cu tin hende den casi tur ramo laboral na Aruba, cu ta buscando trabao na e momentonan aki.
Buscadonan di trabao
E otro parti ta cu tin hende den sistema cu tin diferente antecedente. Di tur dos banda ta ofrece servicio, tanto di pone e vacatura. Si tin e vacatura habri ta publica esey y busca hende y di un otro banda, den e database, tin hende registra cu ta wardando of buscando trabao den tur ramo. Tin hende a solicita y no a haya trabao. Esey ta un critica cu a haya na DPL. Stamper a splica cu esaki ta varia den hopi aspecto na
momento cu un persona ta busca trabao. Tin persona ta bishita cu simplemente no ta cla pa subi mercado laboral, cual ta pone cu nan no ta haya e trabao. Tin biaha conscientemente, tin biaha inconscientemente. Tambe mester bisa cu tin hopi factor cu ta hunga un rol.
Entrevistanan
Tin dunadonan di trabao cu kisas no ta mesun cooperativo cu otronan riba cierto punto. Cada compania tin nan mesun cultura, nan mesun manera di traha. Tin companianan cu nan exigencianan ta asina halto cu ta pone cu e candidato tin cu bay un extra miyapa asina e por bin na remarca pa haya e trabao. Na e momentonan aki ta mira cu tin hopi tendencia cu ta hunga un rol den e proceso di busca y haya trabao. Tin por ehempel companianan cu tin cu bay tres entrevista, te cu 4 tin biaha, pa haya un trabao y esaki awendia ta hasta pa funcionnan basico.
Tin companianan grandi cu pa haya cierto posicion, pa con inferior cu e por ta, bo mester por bay tres entrevista, convence HR Departamento cu bo ta e miho candidato pa e trabao. Abo mes como buscado di trabao, con bo ta presenta bo mes, con bo ta bisti, con bo ta expresa bo mes, ta haci un impresion si bo ta cualifica pa bo haya dicho trabao of no.
Por ultimo, Stamper a splica cu si bo ta un hende confiabel, un hende cu ta cla, positivo y esaki ta basicamente locual e dunadonan di trabao kier scucha di e posibel empleado.
